Aiaraldeko perretxikozaleen hilabeteak izango da dira urria eta azaroa, egitarau oparoak antolatzen baitituzte Amurrio, Laudio eta Urduñan.
Laudion bi hitzaldirekin emango diote hasiera ekintza maratoiari. Basoko orkidea arabarrei buruzko solasaldia egongo da urriaren 29an eta zizak hazteko moduei buruzkoa 30ean. Zubiko etxean izango dira bi zitak, 19:00etan. Hilaren 31an erakustaldi gastronomikoa egingo dute, ordu eta toki berean.
Azaroaren 3an, aldiz, goizean bildutako perretxikoen sailkapena egingo dute mikologia elkartearen egoitzan, 17:30ean. Azaroaren 4a izango da egun nagusia. Goiz osoko egitaraua egongo da Herriko plazan, 10:00etatik aurrera.
Amurrion, menu eta pintxoak nagusi
Amurrion ere egitarau oparoa egongo da. Perretxikoekin eginiko pintxoen XIII. lehiaketaz gozatzeko parada egongo da herriko hainbat tabernetan urriak 27 eta 28ko eta azaroak 3 eta 4ko asteburuetan. Perretxikoekin eginiko menuak eskainiko dituzte hainbat jatetxek lau egun horietan.
Azaroaren 3an eta 4an, aldiz, Laudioko eskema jarraituko dute: lehen egunean perretxikoen sailkapena egingo dute eta bigarrenean goiz osoko jarduna egongo da, Gorobel Ibilaldia egingo dela probestuta.
Urduñan, I. Zubi Mikologikoa
Urduñan, aldiz, I. Zubi Mikologikoa antolatu dute udalak eta Foru Aldundiak, azaroaren 1etik 4ra luzatuko dena. Perretxiko eta onddoekin eginiko pintxoak dastatzeko parada egongo da egun horietan hiriko hainbat tabernetan.