Larunbatean, gaueko hamabietan abiatu zen Murgiatik “Hiru Haundiak” iraupen luzeko probaren XXI. edizioa. Parte hartzaileek 101 kilometro eta Gorbeia, Anboto eta Aizkorri gailurrei egin beharko zioten aurre hurrengo 24 ordutan.
Mila kirolari inguruk hartu zuten parte eta horien artean Aiaraldeko ordezkaritza zabala aritu zen, eskualdeko 72 lagun orotara.
"Jai-giroa" nagusi
Parte hartzaileetaz gain, ehunka zaletu egon dira ibilbide osoan zehar kirolariak animatzen. Unai Llano izan da horietako bat, Landan izan da Aretako korrikalariak animatzen. Irteeran, helmugan zein ibilbidean zehar goiroa “oso polita” izan dela azpimarratu du, “jai-giroa zen nagusi, helmugan kirolari asko seme-alabekin sartu dira eta oso polita izan da, izugarria da lasterketa hau.”
Araian zuten mendizaleek helmuga zain, Aizkorri menditik igaro eta kilometro gutxira. Sailkapen orokorrean Javi Dominguez izan da garaile, 101 kilometroak 11 ordu eta 14 minututan osatuta.
Ivan De la Cruz Aiaraldeko azkarrena
Eskualdeko azkarrena Ivan de la Cruz laudioarra izan zen, helmuga 13 ordu eta 51 minututan zeharkatu zuen, sailkapen orokorrean 24. postura igoz. De la Cruzek lasterketaren edizio "bereziki gogorra" izan zela azpimarratu du, "asko disfrutatu dut, baina lainoak asko zaildu zuen froga, inoiz ez dut hain laino dentsorik ikusi. Horrelako egoeratan ezin zara azkar ibili ez baituzu ezer ikusten eta erori eta lesionatzeko arriskua dago; gainera deshidratazioa handiagoa da eta horrek asko nekatzen zaitu".
Laudioarra egindako denborarekin pozik agertu bada ere "beti hobetu daitekeela" azpimarratu du, garrantzitsuena "disfrutatzea eta ondo pasatzea" dela argi utzita.
Emakumezkoetan Maria Menoyo, Amurrio Trail taldeko kidea, izan zen Aiaraldeko azkarrena, ibilbide osoa 17 ordutan eta 43 minututan osatuta.