12,4 milioi euroko irabazi garbiak izan ditu Tubacexek urtarriletik irailera bitartean. Igoera oso nabarmena da hori Aiaraldean finkatutako talde multinazionalarentzat, iaz 1,1 milioi euro baino ez baitzituen irabazi denbora tarte berean. Salmentetan igoera nabarmena (%40,3koa) izan du, 519,9 milioi euroko marka erdietsita.
Epe ertainerako aurreikuspena “oso positiboa” dela nabarmendu du Jesus Esmorisek. “Proiektu asko ditugu esleipen pipelinean”, azaldu du enpresaren kontseilari delegatuak.
Gauzak hala, 2019a “berreskurapenean” igaroko dutela eta 2020 eta 2021an sektorean “zabalpen indartsua” egongo dela aurreikusten dute zuzendaritzako kideek.
Azaldu dutenez, Tubacexen estrategia urte askoko proiektu handietan oinarritzen da. Tokiko enpresetan eginiko ekoizpen eta garapen teknologikoa elkarlanean egiten dute produktua bidaliko den herrialdeetako lehen mailako enpresekin. “Estrategia horren arrakastaren seinale da Egiptoko Gobernuarekin eginiko akordioa energia nuklearra garatzeko”.
Tokiko lantegietako egoera
Emaitza oparo horiek kontraste nabarmena dute enpresak eskualdean dituen lantegietako egoerarekin. Izan ere, Tubacex Taylorreko kideek sei eguneko greba egin zuten udan lan hitzarmenaren defentsan, eta enpresak bi langile kaleratu zituen.
"Gaur egun egoerak berdin jarraitzen du", adierazi dute langileen ordezkariek, "kaleratutako bi beharginak ez dituzte berriz onartu eta orain zuzendaritzak urtero 15 egun gehiago lan egitea eskatu digu, baina hori arrazoitzeko inolako plan industrialik aurkeztu gabe". Eusko Jaurlaritzarekin bilerak egin dituzte Tubacex Taylorreko beharginek. "Lan departamentuaren deiaren zain gaude, laster izango ditugu albiste gehiago".