Aiaraldeko pentsionistak kalera aterako dira beste behin pentsioen defentsan, iragan ekainaren 28an Amurrion egin bezala. Azaroaren 24an eskualdeko manifestazioa deitu dute Laudioko Lamuza Plazatik abiatuta.
1.080 euroko pentsio minimoa eta Euskal Herriko pentsio sistema propioaren aldarrikatzea izango dira larunbateko mobilizazioaren ardatza. Halaber, Aiaraldeko pentsionistek emakumeek burutzen dituzten aitortu gabeko lanak, “genero-arrakala” edota 1.200 euroko gutxieneko soldataren aldeko borroka aintzat hartu dituzte publiko egin duten manifestuan: “guztion borroka baita pentsio publikoen defentsa”.
Bide horretatik, eskualdeko herritar orori luzatu diote larunbateko mobilizazioan parte hartzeko gonbitea. “Hori guztia lortu arte eutsiko diogu borrokari. orroka horretan hiritar ororen ulertzea eta elkartasuna behar izango dugu". Pentsionisten hitzetan, “pentsio publikoen aldeko borrokaren lorpenak biztanleria osoarentzat dira mesedegarriak”.
Borroka luzea
Urtarrilean hasi ziren Euskal Herrian pentsionisten mobilizazio jendetsuak. Ordutik astelehenero elkartu dira eskualdeko erretiratuak Laudio, Amurrio, Urduña edota Artziniegako plazetan. Borroka horri esker “urte honetako murrizketak geratzea” lortu dutela gogorarazi dute.
Uda hasieran eskualdeko mobilizazioa egin zuten Amurrion eta ehunka herritar batu ziren deialdira.
