Imanol Segurak lortu zuen Arabako Xake Txapelketako garaipena larunbatean Gasteizen. 7 astez lehiatu da proba hiriburuan eta asteburu bakoitzean partida bakarra jokatzen zuten kirolariek. 41 zaletuk parte hartu dute txapelketan.
Imanol Segurak adierazi du: "Gustura nago egindako txapelketarekin. Iaz ez zen posible izan, baina aurten gogoz ekin diot hasieratik eta txapela janztea lortu dut".
Xakeari buruz galdetuta, txapeldun berriak azaldu du: "betidanik izan dut gustuko xakea eta horregatik jokatzen dut, baina esan beharra dago buru argitasun eta arintasun mentala lantzeko tresna interesgarria iruditzen zaidala. Horretan antza dauka bertsolaritzarekin".
Amurrioarrak uste du xake zaletasuna zabaltzea zaila dela, joko teknologikoekin lehiatu behar baita. Hala eta guztiz ere, itxaropena ez du galtzen: "Geroz eta arraroagoa bada ere, noizbehinka tabernaren batean jendea xakean jokatzen ikusi izan dut, beren kafe edota garagardoekin. Poz handia hartzen dut halakoetan, oro har, sakelakoari itsatsita egoten baikara, gehiegitxo, nire ustez".
Erlantz Miguelez 3. sailkatua
Aiaraldeko beste xake jokalari bat kokatu da Arabako Txapelketaren lehenengoen artean. Zehazki, Erlantz Miguelez laudioarrak 3. postua erdietsi zuen.
Miguielez herriko xake elkartean aritzen da eta gazteak trebatzen ditu. Izan ere, taldeak Kultura Etxean saioak egiten ditu ostiraletan 18:00etan eta larunbatetan 11:00etan.