Ekimen ugari egingo dituzte bihar -abenduak 6- Aiaraldean Espainiako Konstituzioaren Egunaren aurka. Auzolanak egingo dituzte Arrankudiaga-Zolloko Gazte Asanbladako kideek. 9:30ean batuko dira Txondor Gaztetxean. “Herriko gazteok erakutsi nahi dugu espainiar konstituzioa ez dela gurea eta beraz guk ez dugula jai egun hau ospatuko”, adierazi dute. Ez dira lanean aritzera mugatuko. Bazkaria egingo dute 14:30ean eta dokumentala proiektatuko dute gero, 17:00etan.
Herri Eskolak Amurrion
Aiaraldeko Ikasleok Zorrotz taldeak Herri Eskolak egingo ditu Amurrioko Zaraobe Institutuan. “Konstituzio egunaren aurrean intsumisio eguna antolatu dugu, ikasleok ez dugulako ezer ospatzeko”, argitu dute, “78ko erregimenaren konstituzio horrek 40 urte betetzen ditu ostegunean eta horren aurrean Zaraobeko ateak irekitzea erabaki dugu, klasera joan nahi duen pertsona orok aukera hori izan dezan”.
Hainbat jarduera egingo dituzte bertan: gosaria, ezagutza jolasak, antzerki tailerra... “Klase egun arrunt baten programaziotik at geratzen diren ekintzak” prestatu dituzte, “ikasleongandik eta ikasleontzat diseinatutako alternatiba proposatzea” baita euren helburua: “Gure nahi eta beharrak kontuan hartuz, hala nola, sormena eta ikasleon arteko harremanen garapena”.
Egitaraua ixteko, trena hartuko dute Bilbon egingo den Euskal Errepublikaren aldeko mobilizaziora joateko. “Herritar zein ikasleon eskubide eta askatasunak bermatzeko Euskal Herri aske, burujabe, duin, justu eta feminista bat behar dugu”, aldarrikatu dute eragileko kideek.
Auzolanak Laudioko Gune Askean
Aiaraldeko Ikasle Abertzaleak antolakundeak, aldiz, auzolanak antolatu ditu Laudioko Gune Askea espazioa atontzeko.
Datorren ostegunean, Konstituzioaren eguna izanda, erantzun intsumiso bat planteatuko dugu ospakizun arrotz horren aurrean. Gure partez, auzolanak planteatu ditugu @LaudiokoGAskea -ngure espazio propioak indartzeko. 11etatik aurrera, zuen zain egongo gara! #Abenduak6
— Aiaraldeako IA (@AiaraldeakoIA) 2018(e)ko abenduaren 4(a)
Udaberrian okupatu zuen gazte talde batek Lamuza Parkean dagoen gela hori, ikasgela bat atontzeko helburuarekin.