Mendi taldeek hamaika ekintza antolatu dituzte 2018a gailurretatik agurtzeko. Lehenengo zita Amurrioko Mendiko Lagunak taldeak antolaturiko irteera izango da, Montejurrara. Abenduaren 15ean joango dira Nafarroako mendi horretara eta 3 orduko ibilbide baten ostean Arabar Errioxako upategi bat bisitatuko dute. Izen emateak 50 euroko kostua izango du bazkideentzat eta Mendiko Lagunak taldearen egoitzan egin ahalko da.
Txarlazo Mendi taldeak ere mendi irteera eta bazkaria antolatuko ditu egun berdinerako. Urduñarrak 9:30ean abiatuko dira Foru Plazatik eta eguerdian hiriko Peña La Barkaren txokoan bazkalduko dute.
Arrankudiaga-Zolloko Matxinkorta mendi taldeak abenduaren 16an agurtuko du urtea. 9:00etan orientazio froga herrikoia abiatuko dute Arrankudiagako plazatik. 12:30ean bilera orokorra deitu dute urteko balorazioa egiteko, eta 14:00etan herri bazkaria egingo dute.
Elkartasuna plazatik gailurrera
Urtero bezala, Babiora igoera antolatuko du Amurrio Trail taldeak abenduaren 24rako. Bertan Montes Solidarios taldeko kideekin batera aniztasun funtzionala duten mendizaleak Babio mendiko gailurrera lagunduko dituzte. Ekimen jendetsu horren atarian egingo dute “Babio NON STOP” ekimena, hilaren 23an. Bertan, arratsaldeko seietatik aurrera Babiora jendea etengabe igotzen egotea da helburua, azken igoera abenduaren 24koa izanik. Bildutako dirua ataxia telangiektasia gaitza duen jendea laguntzeko bideratuko dute. Ekimenaren antolatzaileen aburuz, “urtea ametsak betetzen eta familia artean bukatzeko aitzakia bikaina da” Babio igoera.
Amurrioko I. krossa
Abenduaren 23an beste kirol zita garrantzitsu bat antolatuko dute Amurrion Oinkariak atletismo taldeko kideek: Amurrioko I. Krosa. Goizeko hamarretan abiatuko da lehenengo kategoria Refor kirol guneko zirkuituan barrena eta eguerdira arte luzatuko dira lasterketak.
Adin guztientzako saskibaloia
Urduñako Bedarbide Saskibaloi Taldeak, urtero bezala, saskibaloi ekintzak antolatuko ditu urte amaierarekin batera, abenduaren 26tik eta 28ra. Kirola gazteenei hurbiltzea izango da helburua.
Abenduaren 28an Urduñako Bedarbide eta Laudioko Sugarrak taldeen arteko norgehiagokek hartuko dute Urduñako Jai Alai frontoia. 17:00etan bi taldeetako kideekin osatutako talde mistoak arituko dira buruz buru eta 19:00etan talde seniorrak lehiatuko dira.
Herriaren Txapelketa
Abenduko ostiral guztietan Herriaren txapelketaren norgehiagokak jokatuko dira Aretako Frontoian. Euskadiko Federazioaren 4 t’erdiko txapelketaz gain, senior eta promesa kategorietako eskuz binakako partidak ere jokatuko dira.
Gabonzahar eguna
Abenduaren 31an ere kirol zitarik ez da faltako. Txarlazo Mendi taldeak urteko azken igoera antolatuko du izen bereko mendira. Martxa 9:30ean abiatuko da Foru Plazatik. Toki berdinetik abiatuko da ohiko San Silvestre lasterketa, 18:30ean.
Orozkon ere San Silvestre duatloia antolatuko dute. Aurtengoa XXVI. edizioa izango da. Mozorrotutako kirolariek Orozkoko kaleak hartuko dituzte beste behin.