Aiaraldeko Enpresen Koordinaziorako Federazioak (AEKO) Aiaraldeko Erakusleihoen V. Lehiaketa antolatu berri du. Laudio, Okondo, Artziniega eta Amurrioko 46 establezimenduetako eskaparateek parte hartuko dute txapelketan.
Erakusleihoak apaintzeko gaia librea izango da eta komertzioan ohikoan saltzen diren produktuak agertu beharko dira derrigorrean. Eskaparateetan adituak diren hiru pertsonek osatutako epaimahai tekniko batek baloratuko ditu partehartzaileen lanak. Originaltasuna, kolorea, argiztatzea, sormena eta produktuaren ikusgarritasuna baloratuko dituzte.
Hiru sari egongo dira lehenengo hiru postuetan geratuko diren establezimenduentzako, 700, 300 eta 150 eurokoak, hurrenez hurren. Aiara eta Okondoko eskaparate onenek trofeo bana izango dute gainera. Arabako merkatarien federazioak (AENKOMER) 150 euroko azken sari bat jarriko du, eskaparate deigarrienarentzako.
Sari banaketa abenduaren 19an egingo dute, Okondon. AEKOk eskualdeko herritar orori luzatu die erakusleihoak bisitatzeko gonbitea.
Herrietako lehiaketak
Amurrion, Artziniegan eta Laudion erakusleiho lehiaketak egingo dituzte baita ere. Horien sari banaketa Aiaraldeko erakusleiho lehiaketaren sari banaketaren barruan egingo dute, abenduaren 19an Okondon.
Laudioko lehiaketak 25 urte
APILL elkarteak antolatutako Laudioko lehiaketak 25. edizioa ospatuko du aurten. Guztira 21 eskaparatek parte hartuko dute. Epaimahai tekniko batez gain, herritarrek ere izango dute irabazlea bozkatzeko aukera abenduaren 16ra arte. Aurten, berritasun bezala, kategoria berri bat ireki dute antolatzaileek udalaren laguntzarekin, eskaparateetan euskarak duen integrazioa saritzeko.