Abenduaren 19an Aiarako V. eta Laudioko XXV. Erakusleiho Lehiaketaren sari banaketa egin zen Okondoko Astobiza upategian.
Gaueko irabazle nagusia Lorea Lurrindegia izan zen, eskualdeko lehiaketaz gain, Laudiokoa ere irabazi baitzuen.
Aipatzekoa da, era berean, herriko lehiaketaren 25 urteetan izandako jardueragatik ere trofeoa eskuratu zuela, baita Aenkomerren saria Aiarako erakusleiho deigarriena izateagatik.
Laudioko txapelketak, dena den, epaimahai teknikoaz gain, herri epaimahaia izan zuen. Herritarren 716 bozka jaso dira eta horien arabera honako hau da podiuma:
1. Almacenes Alava.
2. Monai.
3. Tapicería Juan.
Herritarren parte hartzeak ere badauka bere saria, horrela, Liber Beltrán Ruizek Gabonetako saskia irabazi du, Esther López Valdiviesok eta Pilar Ortega Salazarrek, berriz, 30€ko bi erosketa txartel.
Aurtengo berritasuna, aldiz, Laudioko Udalak erakusleihoan euskara sartzeari emandako saria izan da, Kukumak jaso duena.
Epaimahai teknikoak, bere aldetik, aipatu dugun Lorea Lurrindegiaz gain, bigarren eta hirugarren izendatu ditu Irusta Lurrindegia eta Kukuma, hurrenez hurren. 21 dendek hartu dute parte eta horien artean, erakusleiho berri hoberena Nina Life Styling dendak jaso du.
