aiaraldea.eus

2018ak Aiaraldean utzitakoak, 3 minututan kontatuta

Erabiltzailearen aurpegia Erredakzioa   Jendartea  Aiaraldea

Mugimendu feministarena da 2018ak Aiaraldean utzi duen irudi indartsuena. Milaka emakumek egin zuten bat martxoaren 8ko greba feministan, eta orduz geroztik makina bat ekimen eta mobilizazio jendetsu egin dituzte eskualdean.

Pentsionistak, aldiz, astero egon dira euren aldarriak eskualdeko hainbat plazetan zabaltzen, eta mobilizazio arrakastatsuak deitu dituzte Laudio eta Amurrion.

Ikasleek, euren aldetik, LOMCE, Heziberri eta PISAren aurka aritu dira. Eskualdeko ikastetxe gehienetan egin dute planto Eusko Jaurlaritzak ezarritako azterketei.

Urduñan, aldiz, hainbat urteetan zehar garatutako borrokaren fruituak jaso dituzte, udal sukalde ekologikoa inauguratuta.

Ondare historikoaren berreskurapenean ere urte oparoa izan da 2018a. Emaitza esanguratsuak lortu dituzte Babion, San Pedron, Arrankudiagan edota Ermualden eginiko indusketa arkeologikotan. Horrez gain, memoria historikoa sustatzeko ekimenak ere ez dira falta izan.

Lan munduari dagokionez, greba, lanuzte eta mobilizazio ugari egon dira eskualdeko lantegietan. Tamalez, 2018an lau langile zendu dira, hiru lan istripuetan eta bat amiantoaren ondorioz.

Kultura sorkuntzari dagokionez urte mamitsua izan da 2018a. Dantza taldeek protagonismo berezia izan dute, hainbat ikuskizun taularatu baitituzte.

Erabakitzeko eskubidearen aldeko borrokak ere mugarriak izan ditu. Milaka lagunek hartu zuten parte maiatzean eskualdeko hainbat herritan eginiko galdeketan. Ekainean, ordea, giza-kateak zeharkatu zuen Aiaraldea.

Adierazpen askatasunaren aurkako jazarpenak ere izan du protagonismoa. Otsailean Julen Ibarrola gazte amurrioarra espetxeratu zuten. Alfredo Remirez, aldiz, azaroan geratu zen aske, urtebeteko kondena beteta.

Kirolak kontaezin ahala titular utzi ditu eskualdean. Aiaraldear askok eskuratu dituzte goi mailako lorpenak. Euskararen aldeko aldarria Aiaraldetik Himalaiara arte eraman zuten mendizaleek eta ekintzaz lepo egon da eskualdeko kirol egutegia. Hutsuneak ere egon dira: Jon Urkijo mendizalea, Herriaren Pilota Elkarteko Rafa Olabarria eta CD Orduñako Aaron Martín Guillén gazteak utzitakoak, hain zuzen.

Euskalgintzarentzat ere urte mugitua izan da 2018a. Udaberrian Artziniegako dozenaka elkarte eta norbanako aritu ziren elkarlanean Aiaraldea hedabidearen aldeko elkartasun jaia antolatzen. Ekintza indartsuena, aldiz, urte amaieran zian da: Euskaraldia. Milaka ahobizi eta belarriprest aktibatu dira eskualdean.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa