Urte berriarekin batera iritsi zen Markixana eta Basaurbeko araztegien proiektuaren atzerapen iragarpena. Espainiako Gobernuak adierazi zuen obra horiek 2019ko aurrekontuen onarpenaren menpe daudela. Trantsizio Ekologikorako Ministroaren hitzetan, 12 edo 15 hilabete atzera zitekeeen lanak gauzatzeko abian jarritako prozesu luzea.
Hori dela eta, EH Bilduk proposamen bat helarazi dio Eusko Jaurlaritzari: erakundeak obrak bere gain hartzea, subsidiarioki, eta ondoren Kupoaren beherapenaren bitartez berreskuratzea lanak egiteko jarritako dirua. “AHTa bezalako proiektuak gauzatzeko ez da horrelakoak egiteko arazorik egon, eta uste dugu proiektu honek garrantzi handiagoa duela”, nabarmendu du Jon Ander Altubek.
Laudioko alkateordeak adierazi duenez, mozioa aurkeztuko dute udalbatzan proposamena plazaratzeko, EH Bilduren izenean. Aiaran eta Amurrion ere erregistratu dituzte mozioak. Modu horretan, “egungo blokeoa gainditu” nahi du koalizioak. Salatu dutenez, “lanek hiru hamarkadako atzerapena dute eta 45.400 bat biztanleri eragiten diete, araztu gabeko ura botatzen dutelako Nerbioi ibaira.