Aiaraldeko mendi taldeek ekin diote neguko kirolen eskaintzari. Eskiatzera joateko aukera ugari egongo dira datozen asteetan eskualdean. Berbalagunek, Mendiko Lagunakek, Elur taldeak eta Matxinkortak iragarri dituzte txangoak dagoeneko.
Mendiko Lagunak Amurrioko taldeak Alto Campoora joko du otsailaren 9an, "kranpoien inguruko ikastaroa egiteko”. Otsailaren 23an eta 24an, berriz, Candanchura hurbilduko dira, alpinismo eta mendiko eski ikastaroak jasotzera. “Neguko zeharkaldia martxoaren 9an egingo dugu Castro Valneran”, aurreratu dute.
Amurrioko Elur taldeak, bestalde, urtarrilean gauzatuko du urteko lehenbiziko irteera. Peyragudeseko estaziora joko dute hilaren 25etik 27ra. Ohi bezala, Amurrioko Telefonicatik aterako da autobusa, eta Bilbon jasoko ditu gainontzeko partaideak. 144 euroren truke bidaia, 2 eguneko aterpetxea eta forfaita edukiko dute. “Bazkidea ez bazara 5€ gehitu behar zaizkio prezioari, eta federatuta ez bazaude 15€”. Abenduan Cerlerren izan ziren amurrioarrak.
Gurasolagunak, Valdezcarayra
Aiaraldeko Berbalagunek, aldiz, otsailaren 16a aukeratu dute Valdezcarayra bertaratzeko. Iaz ere egin zuten irteera, “Gurasolagun” dinamikaren baitan. Eskualdeko ibilaldia izaki, autobusak hainbat herritan jasoko ditu partaideak. 7:30ean abiatuko dira, eta 19:00etarako aurreikusi dute itzulera.
“Iaz disfrutatu genuen beste egiteko asmoa dugu aurten ere. Valdezcarayko eski pistetara joango gara. Autobusa eta hastapen ikastaroa doan izango da, eta alokairua zein forfaita erabiltzaileen kontu”, zehaztu dute. Alabaina, ezinbestekoa izango da 4 urte baino gehiago izatea. Izena emateko azken eguna urtarrilaren 31 izango da, plaza kopurua mugatua baita. 607673744 zenbakira deituta beharko dute izena, edota aiaraldea@aek.eus helbidean.
Arrankudiagatik Candanchura
Asteburu berdina aukeratu dute Matxinkorta taldekoek arrankudiagarrak eskiatzera gerturatzeko. Formigal eta Panticosa artean ibiliko dira. Autobusa eta Forfaita eskainiko dute 140 euroren truke, bazkideek eta umeek 130€ ordaindu beharko dituztelarik. Prezioaren barnean bidaia, aterpetxea, afaria eta gosaria daude. Otsailaren 16an aterako da autobusa Arrankudiagatik 5:30ean, eta igande iluntzean itzuliko dira herrira. Izena emateko matxinkorta@gmail.com helbidera zein Facebook kontura bidali behar da mezua, edota Ekilore dendatik pasa.