aiaraldea.eus

Gorobelen zeharkaldia antolatu dute Euskal Herriko Berbalagunek

Erabiltzailearen aurpegia Izar Mendiguren Cosgaya   Kirola  Aiaraldea

Otsailaren 24an izango da irteera. Lau orduko txangoa aurreikusi dute. 

Gorobelen zeharkaldia antolatu dute Euskal Herriko Berbalagunek
Berbalagunek hainbat irteera egin dituzte dagoeneko. / AEK | Ikusi handiago | Argazki originala

Berbalagunek Aiaraldea bisitatuko dute otsaileko azken igandean, hots, hilaren 24an. Hainbat ibilaldi antolatu dituzte Euskal Herrian barrena, eta hurrengoa eskualdean izango da. Hain zuzen, Gorobel mendilerroan zehar ibiliko dira. Izen-ematea doakoa da, baina otsailaren 21a izango da horretarako azken eguna. 

Maila ertaineko zeharkaldia
Antolatzaileek aurreratu dutenez, maila ertaineko zirkuitua osatuko dute. 9:00etan geratuko dira  Lendoñogoitiko aparkaletuan, azalpenak eman eta 9:30ean abiatzeko. Jarduera adin guztientzat prestatua dago, "maila ertainekoa izango da, umeentzat ere egokia, mendian ibilitakoak badira". 11 kilometroko ibilbide zirkularra proposatu dute: Lendoñogoititik Iturrigorrira (Tologorri) eta Menerdigatik Lendoñogoitira. "Iraupena 4 ordukoa izango da. Oinetako erosoak eta zira eraman beharko dira, baita ura eta hamaiketakoa ere", zehaztu dute.

Argazki lehiaketa
Horrez gain, Gorobel mendilerroko paisaiak biltzeko argazki lehiaketa egingo dute. Gehienez 3 irudi aurkeztu ahalko dira, 660861633 telefonora bidalita. Lanak aurkezteko epea otsailaren 26a izango da. Euskal produktuen sorta eskuratuko du irabazleak.

Euskal Herriko AEKk antolatu du irteera, Eusko Jaurlaritzaren eta Bizkaia zein Gipuzkoako Aldundien laguntzarekin.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa