Atzoko hauteskunde sindikalek ELA bilakatu dute aukera bozkatuena Tubacex taldean. Amurrio eta Laudioko Tubacex eta Aceralavako lantegien eta bulegoen emaitzek 10 ordezkari eman dizkiote ELAri eta, aldiz, 9 STATi.
ELAk adierazi du 16 urteren ostean, berriro lortu dutela sindikatu nagusia izatea Tubacexen, botoen %33a eskuratuta.
CCOOk 6 kide izango ditu langile batzordean eta Independenteek 3, LABek 2 eta USOk 1. Zehazki, bozka kopuruak hurrengoak izan dira:
- ELA: 252 boza, 10 ordezkari
- STAT: 184 boto, 9 ordezkari
- CCOO: 143 boza, 6 ordezkari
- Independenteak: 53 boto, 3 ordezkari
- LAB: 61 boza, 2 ordezkari
- USO: 50 boto, ordezkari 1
2015eko hauteskundetan ELAk eta STATek ordezkari kopuru bera izan zuten; 12. Dena den, duela 4 urte 8 ordezkari gehiagok osatzen zuten langile batzordea. Hori dela eta, sindikatu bozkatuenek ordezkaritza galdu dute esparru horretan: ELAk 2, STATek 3, eta CCOOk 2, hurrenez hurren.
USO ere ez da heldu aurreko emaitzetara, baina bozak galdu dituelako -14 zehazki-, 5 ordezkari izatetik, bakarra mantentzera, alegia. Independenteek, ordea, hirukoiztu dute euren presentzia, orain 3 kide izango dituzte negoziazio mahaian eta LABek ere antzeko lorpena eskuratu du. Azken lau urtetan ordezkari bat izan du sindikatu abertzaleak eta orain bi izango dituzte.