aiaraldea.eus

Martxoaren 23an egingo dute Aiaraldeko Bulkada Eguna, egun osoko egitarauarekin

Erabiltzailearen aurpegia Txabi Alvarado Bañares   Politika  Aiaraldea

Atzo egin zuten egitarauaren aurkezpena Laudioko Lamuza Parkean eginiko agerraldian.

Martxoaren 23an egingo dute Aiaraldeko Bulkada Eguna, egun osoko egitarauarekin
Atzo egin zuten eguna aurkezteko agerraldia Laudioko Lamuza parkean. / Aiaraldea.eus | Ikusi handiago | Argazki originala

Martxoaren 23an egingo du Aiaraldeko Ernaik Bulkada Eguna. Atzo eguerdian egin zuten egitasmoa aurkezteko agerraldia, Lamuza Parkean. Egunaren egitaraua plazaratu zuten bertan, Laudion egingo baitira ekintza guztiak.

Goizetik gauera arte luzatuko da programa. Eguerdiko hamabietan txupinazoa jaurtiko dute Herriko plazan. Herri azoka, mural margotzea, haurrentzako jolasak, sortzaileen gunea, DJ WSBren musika eta argazki erakusketa egongo dira gero.

12:30ean, aldiz, mahai-inguru bat hasiko da, toki berean. Altsasu eta Amurrioko errepresio kasuak izango dituzte hizpide. 13:30ean kalejira abiatuko da, Builaka batukadarekin, eta 15:00etan herri bazkaria egongo da elizako arkupeetan. Tiketak Amurrioko Txokogorri, Laudioko Ilargi, Orozkoko Itxina eta Urduñako Mugalde tabernetan egongo dira salgai.

Bazkalostean Añubeko troba taldeak kontzertua eskainiko du, eta 18:00etan gazte olinpiadak egongo dira Batzalarrin kalean. Arratsaldeko zortzietan, aldiz, manifestazioa egongo da, "Euskal gazteria aurrera!" lemapean. Gaueko bederatzietan gaztetxera mugituko da jaia, bost musika taldek eskainiko baitute kontzertua bertan: Izatefaltsuak, Eztandak, Oharkabe erromeriak eta Pottors Destroyers DJek.

40 urteko ibilbidea ospatzeko ekimena
Jarrai gazte antolakundea sortu zenetik 40 urte pasa direla eta antolatutako dinamika sortaren barruan kokatzen da Aiaraldeko Bulkada Eguna. Euskal Herriko hainbat herri eta eskualdetan egiten ari dira antzeko ekimenak. Apirilaren amaieran emango diote amaiera kanpainari, Lemoan egingo den Gazte Topagunean.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa