Nolako eguraldia, halako uzta. “Duela 40 urteko eskualdeko klima ez da oraingoa bezalakoa”, baieztatu du Jose Antonio Merino Arabako Jatorrizko Txakolinaren kudeatzaileak.
Nabarmen baldintzatzen du eguraldiak jarduna. “Mugako uda eta neguak eta udaberri zein udazken leunak dira guretzat baldintza onenak, hau da, eguraldia ez aztoratzea, bilakaera arrunta izatea”. Egoera ideala honakoa litzateke, adituaren ustez: negua hotza izatea, udaberrian neurriko euriteak, uda beroa eta udazken leuna.
Eguraldiaren arriskuak
Eguraldia mehatxua da beti uztarentzat, ezbairik gabe. Izan ere, izozteek eta muturreko bero jasek mahastiak izorratzen dituzte. 2017ko uzta, esaterako, izugarria izan zen: “Izozteek ekoizpenaren erdia bidali zuten pikutara. Ondorioz, saldu ezin izan duzun guztia galera bihurtzen da. Eta horri aseguru eza gehitzen badiozu are gehiago. Horregatik nabarmentzen dugu beti seguruaren garrantzia, bestela merkatua galtzen duzu eta”, zehaztu du. Hamazortzi urte daramatza Merinok Arabako Txakolinarekin lanean, eta iazkoa izan zen haren ustez sarraskirik handiena.
2018ko uztaren pronostikoa
Zaila zaio Merinori aurtengo uztaren nolakotasuna aurreratzen: “Beti erratzen zara. Oztopoen lasterketa da gurea, orain euria etorriko baita berriro”.
Izozteen garaia, atzean utzi dute behintzat: “Badirudi lur sail handiek biziraun dutela. Ezin dugu pronostikorik egin, laster euriteak etoriko direlako, gero bero zapladak....”. Aste honetan jasoko dituzte unibertsitatetik 2018ko uztaren azterketa txostenak. Horrenbestez, igandean -ekainak 2- aurkeztuko dute iazko lanaren balantzea, Amurrion ospatuko den Txakolin Egunean.
