aiaraldea.eus

Hiru sari eta kategoria izango ditu Aiaraldea hedabidearen Udako argazki lehiaketak

Erabiltzailearen aurpegia Izar Mendiguren Cosgaya   Komunikazioa  Aiaraldea

Irailaren 21era arte egongo da argazkiak bidaltzeko aukera. Erabiltzaileek aukeratuko dituzte irudi irabazleak, boto bidez. 

Hiru sari eta kategoria izango ditu Aiaraldea hedabidearen Udako argazki lehiaketak
Endika Arribas eta Ainara Berrocalek irabazi zuten iaz lehiaketa. / Aiaraldea.eus | Ikusi handiago | Argazki originala

"Udari klik" argazki lehiaketa abiatu du Aiaraldea hedabideak. Helburua informaziotik haragoko eskaintza osatzea da. Hiru kategoria izango ditu aurtengo edizioak: talde argazkiak, Aiaraldea eta mundua. Parte hartzeko bide ugaritatik bidali ahalko dira lanak. Batetik, whatsapp aplikazioaren bidez, 688848152 zenbakira mezua igorrita. Bestetik, erredakzioa@aiaraldea.eus postara argazkia bidalita eta, azkenik, sare sozialetan -Facebook, Twitter eta Instagramen- #udariklik traola baliatuta. Irudiarekin batera, argazkiaren izenburua, izen-abizenak eta harremanetarako telefonoa jakinarazi beharko dituzte parte hartzaileek.

Hiru sari
Osabarena hotel eta jatetxea, Orduña Plaza Hotela eta Guzurtegi jatetxea izango dira lehiaketako babesleak; hots, sari emaileak. Taldekako argazkien modalitatean Orozkoko Osabarena Hotelean talde batentzat 75 euro arteko otordu bonua izango da saria. Eskualdeko irudirik onenaren egileak, berriz, Urduñako Hotel Orduña Plazan bi lagunentzat gauaz eta spa zirkuituaz gozatzeko aukera izango du. Eta mundua kategoriako lan hautatuak, berriz, Maroñoko Guzurtegi landetxe eta jatetxean bi lagunentzako asteburuko menua jasoko du.

Bi fase
Iaz bezala, herritarrek erabakiko dute zeintzuk diren lanik onenak, boto bidez. Hala, irailaren 21 arte egongo da argazkiak bidaltzeko epea, eta irailaren 21etik 30 arte iraungo du bozketa faseak. Webgune honetan ikusi ahalko dira egunero jasotako lanak; baita bozketa faseko emaitzak ere. Horrenbestez, urriaren 1ean jakinaraziko dira udako argazki lehiaketako irabazleak. 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa