aiaraldea.eus

Aiaraldeko bi izen daude ogasunari diru gehien zor diotenen zerrendetan, zorretan 4 milioi euro baino gehiago pilatuta

Erabiltzailearen aurpegia Erredakzioa   Ekonomia  Aiaraldea

Iazko zerrendetan agertu ziren izen berdinak agertzen dira aurtengoan: Ruben Bravo Gonzalez enpresariarena eta Somolsa enpresarena.

Aiaraldeko bi izen daude ogasunari diru gehien zor diotenen zerrendetan, zorretan 4 milioi euro baino gehiago pilatuta
Iruzur fiskala prebenitzea da zordunen zerrendak argitaratzearen helburua. / Eneko -20minutos.es- | Ikusi handiago | Argazki originala

Gaur argitaratu dituzte Araba, Bizkaia eta Gipuzkoako Foru Aldundiek ogasunari diru gehien zor dioten enpresa eta norbanakoen zerrendak. Aiaraldeko bi izen agertzen dira bertan: Somolsa enpresa urduñarra eta Ruben Bravo Gonzalez enpresariarena.

Bravo Gonzalezek 1.709.452,97 euro zor dizkio ogasunari eta lau enpresa ditu guztira: Iridytrio S.L, Platinorumba S.L, Activos por impuestos diferidos S.L eta Agricola Nini S.L.

Lehen hiru enpresek Laudion dute egoitza fiskala, Jose Mardones kaleko etxebizitza batean. Laugarren enpresa, aldiz, Kantabriako Valdeolea herrian dago kokatua. Laurek, baina, antzeko helburu soziala dute: higiezinen eta aktiboen salerosketa.

Somolsa enpresa
Bizkaiko Foru Aldundiaren zerrendan agertzen da Somolsa Sociedad de Materiales Orduña, 2.370.095,80 euroko zorrarekin. 2004. urtean itxi zuten fabrika eta, ondorioz, ordainketak ere eten zituzten.

Gauzak hala, orduz geroztik urtero agertu da enpresa hori zordunen zerrendan. Gainera, geroz eta diru gehiago zor du, atzerapenak eragindako errekarguak geroz eta handiagoak direlako.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa