aiaraldea.eus

[ANALISIA] Ze pagotxa Tubacexen lan egitea, baldin eta ez bazara hiltzen

Erabiltzailearen aurpegia Aitor Aspuru Saez   Ekonomia  Aiaraldea

Tubacex enpresan lan egiteko irrikan dago eskualdeko zein kanpoko jende ugari, baina gaurko hildakoarekin 3 dira istriputan hil diren beharginak azken 9 urteetan.

[ANALISIA] Ze pagotxa Tubacexen lan egitea, baldin eta ez bazara hiltzen
Langileek bere postuak utzi dituzte gaur istripuaren berri izan dutenean. / Aiaraldea.eus | Ikusi handiago | Argazki originala

Argi dago Lanbide Heziketa ikasten dutenek hautatzeko aukera izanez gero eskualdean, Tubacex enpresan lan egitea aukeratuko luketela. Soldata ondo dago eta 8 orduko lanaldia bukatu eta gero, etxera itzuli zaitezke ardura gehiagorik gabe. Plan bikain horretan oztopo bakarra dago, etxera onik itzuli behar zarela, jakina.

Izan ere, azken 9 urtetan, eta gaurko hildakoa gehituta, 3 behargin zendu dira bere lanpostuan Laudion eta Amurrion. 2010ean Ugaoko gazte bat izan zen eta 2013an azpikontrata baten 41 urteko behargina. Gaur, ordea, Laudioko mutiko bat zendu da.

Istripuaren ostean egindako langile batzarrean kide batek horrelaxe aldarrikatu du: "berdin dio hilero 2.000 edo 3.000 euroren truke izatea, ez da posible langile bat etxera ez itzultzea".

Litekeena da artikulu hau idazteko odola beroegi izatea nire zainetan, baina eskualde honetan denok ditugu lagun minak, estimuan ditugun ezagunak edo senideak Tubacex enpresan lan egiten eta, gainera, lantegian bertan informazioa jarraitzea egokitu zait.

Jakina, konpainia ezaguna da ondo ordaintzen duelako, mozkin handiak sortzen dituelako eta politikoki alderdiek zaintzen dutelako -eskuinekoek bereziki-.

Ez da hain ezaguna, ordea, azkenaldian langileek behin eta berriro salatzen duten prekarietatea. Euren aburuz, azpiegituretan ez da beharrezkoa inbertitzen segurtasuna bermatzeko -etekinak garrantzitsuagoak direlako-. Esaterako, gaur istripua mantenuan gertatu da, eta, antza, sail horretan, ordezko pieza gutxi eta ez egokiak dituzte. 

Horrez gain, kide berrien trebakuntza, lankide zaharren iritziz, ez da nahikoa. Horri gehitu behar zaio jende askok behin behineko kontratua duela. Mantenuko langile batek azaldu duenez: "behin behineko langilea zarenean, enpresa pozik izan nahi duzu eta segurtasun irizpideak ez dituzu guztiz jarraitzen. Bi langilek egiten dutena zuk bakarrik egiten duzu, arazoak ez sortzearren, adibidez. Gainera, gaur egun ez daude langile nahiko segurtasunez gauzak egiteko, eta udan are gutxiago, oporrak daudelako eta postu asko ez direlako ordezkatzen".

Berez, formazio horren faltaren eredu moduan jarri dute gaur istripua jasan duen gaztea, Dual programa egiten egon baita orain dela gutxi arte. Hau da, hilabetez ikasten eta lanean aritu da praktiketan.

Gure ordezkari politikoek eta konpainiako zuzendaritzak berak Tubacex saltzen dute maiz Euskadiko enpresa ikur bezala, baina bistakoa da heriotza aztarna ugari daudela bere lantegietan. Agian garaia da eskatzeko agintari horiei dominak jartzeko bakarrik ez egoteko, eta horrelako egoerak ekiditeko ere zerbait egitea, 9 urtetan hiru langile hiltzea ezin baita kasualitatea izan.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa