Azken txanpari ekin dio Aiaraldea hedabideko "udariklik" argazki lehiaketak. Ekainaren 21ean abiatu zen dinamika, eta irailaren 21 arte egongo da lanak aurkezteko aukera. Hiru bide daude horretarako: posta elektronikoa (erredakzioa@aiaraldea.eus), whatsappa (688848152) eta sare sozialetan #udariklik traola baliatzea (Facebook, twitter eta instagramen).
Hiru sari eta kategoria
Aurtengo egitasmoan hiru modalitate prestatu ditu komunikabideak: Aiaraldea, mundua eta talde argazkiak. Osabarena hotel eta jatetxea, Orduña Plaza Hotela eta Guzurtegi jatetxea izango dira lehiaketako babesleak; hots, sari emaileak. Taldekako argazkien modalitatean Orozkoko Osabarena Hotelean talde batentzat 75 euro arteko otordu bonua izango da saria. Eskualdeko irudirik onenaren egileak, berriz, Urduñako Hotel Orduña Plazan bi lagunentzat gauaz eta spa zirkuituaz gozatzeko aukera izango du. Eta mundua kategoriako lan hautatuak, berriz, Maroñoko Guzurtegi landetxe eta jatetxean bi lagunentzako asteburuko menua jasoko du.
Iaz bezala, herritarrek erabakiko dute zeintzuk diren lanik onenak, boto bidez. Irailaren 21etik 30 arte iraungo du bozketa faseak. Webgune honetan ikusi ahalko dira egunero jasotako lanak; baita bozketa faseko emaitzak ere. Horrenbestez, urriaren 1ean jakinaraziko dira udako argazki lehiaketako irabazleak.