aiaraldea.eus

Plazetara atera dira berriz

Erabiltzailearen aurpegia Erredakzioa   Jendartea  Aiaraldea
Plazetara atera dira berriz

Plazetan daude berriz eskualdeko pentsionistak. Abuztuan  mobilizazioak egin zituzten Laudion eta Amurrion, bi herrietako jaiak zirela baliatuta. Astelehenero biltzeko asmoa dute orain, pentsio duinen aldeko aldarriari indarrez heltzeko prest. Lehen deialdia jakinarazi dute dagoeneko: mobilizazioa egingo dute irailaren 30ean.

Pentsionistak izan dira, mugimendu feministarekin batera, azken urteetan eskualdean mobilizazio jendetsuenak egin dituztenak. Ia bi urte igaro dituzte astelehenero Artziniega, Laudio, Amurrio eta Urduñan elkarretaratzeak egiten. Herenegun berriz bildu ziren plazetan, pentsio duin eta publikoen aldeko aldarriari berriz ere gogor ekiteko prest.

Uztailean egin zuten iragan ikasturteko azken mobilizazioa. “Manifestazioa egin genuen Urduñan, ehunka pentsionista batuta”, azaldu du Iñaki Barandiaranek. Udan bertan behera utzi dituzte astelehenetako zitak, baina ez dira geldirik egon. “Abuztuaren 13an Amurrioko jaietan mobilizatu ginen, 17an Laudiokoetan eta 19an Bilbokoetan”, gogorarazi du Pentsionistak Martxan taldeko kideak.

Ikasturte berria hasita, “tentsioa mantentzen” jarraitzea dute xede. “Kontsumorako Prezio Indizearen araberako igoerak lortu dira pentsioetan, baina borrokan jarraitu behar dugu. Espainian oraindik ez da gobernurik osatu, eta badirudi beste hauteskunde orokor batzuetara goazela, etorkizuna iluna da”.

Urriaren 30ean mobilizazioa
Gauzak hala, astelehenero mobilizatzeko erronkari eutsi diote pentsionistek, eta zita berezia jarri dute irailaren 30erako. “Urriaren 1a Nagusien Nazioarteko Eguna denez, manifestazioa egingo dugu bezperan”.

Bizkaiko pentsionisten plataformekin koordinatzen dira Aiaraldekoak. “Bilboko bileretara joaten gara gutako batzuk, eta eskualdera ekartzen ditugu gero bertan proposatzen direnak”.

Aldarria orain arteko berdina izango da aurrerantzean ere: gutxiengo pentsioa 1.080 eurokoa izatea. “Hala ere, gutxiengo soldatarekin -900 euro- berdintzea proposatu dugu, lehen pauso gisa”, zehaztu du Barandiaranek, “pentsioak mantendu egin behar ditugu, bai ala bai. Bere nagusiez arduratzen ez den herrialde bat itsu dago”.

Argazkiak: Roberto Arribas eta Txabi Alvarado Bañares
Erredakzioa: Txabi Alvaarado Bañares

Ikusi argazki guztiak handiago

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa