Igandean Arrigorriagako Megaduatloia egin zuten eta eskualdeko bi taldek parte hartu zuten proban. Alde batetik, Oinkariak Triatloi taldeko Jose A. Cantero laudioarrak, Sergio Markina amurrioarrak, Dani Ibarrola laudioarrak eta Ander Ganzabal orozkoarrak Aiaraldeko Trialikate Taldea osatu zuten eta 2. postua eskuratu zuten.
Aiaraldeko selekzio txiki hori podiumera igo zen eta Maite Ibarra alkatearen eskutik jaso zuen garaikurra.
Edonola ere, eskualdeko parte hartzaile gehiago egon ziren, Oinkariak Triatloi Taldeak 5. postua lortu baitzuen. Jon Llano, Alex LLano eta Jon Ander Saez amurrioarrak eta Juanjo Hernandez laudioarra aritu ziren elkarrekin.
Berez, lasterketa txandaka egin zen eta lau probek osatu zuten. Korrika hiru zati egin behar ziren; 9, 7 eta 5 kilometroko ibilbidea beteta. Azkenik, 30 kilometroko bidea egin behar zuen laugarren kideak bizikletaz.
Lasterkari guztiak pozik zeuden lehiaketa ereduarekin, baina aipatu zuten bidea ez zegoela ondo markatuta eta okerreko norabidea hartu zutela zenbait partaidek.