Zurrumurruen aurkako dinamikek ez dute etenik. CEAR erakundearen bidez, azaroaren amaiera arte luzatuko dute "Bizilagunak etxera" dinamika. Hain zuzen, igandean izango da kulturen topaketa Araba osoan.
Hainbat kulturetako familiek elkarrekin bazkari edo otordu bat egitean datza egitasmoa. Eskualdean urtero antolatzen dute trukea, Amurrio zein Laudioko zurrumurruen aurkako sarearen bitartez:
Igandean, txokolate jana Laudion
Etxeetan ez ezik, plazetara hedatuko dute ekimena. Bizilagunak Araba ekimenaren testuinguruan txokolate jana egingo dute igandean herriko plazan. "Herritarren aktibismoak bultzatuta antolatu dugu", adierazi dute oharrean. Kultur aniztasuna sustatzea dute helburu, harremanak sendotze aldera: "Migranteen eta errefuxiatuen giza eskubideen defentsan borondatez lan egiten dugun pertsonen taldea gara. Taldekideok herritar guztiak gonbidatzen ditugu datorren igandean, azaroak 17, kultur arteko txokolatera etortzera. Arratsaldeko bostetan ikusiko gara udaletxeko plazan".
Itzi Azumendik hartzen du parte, besteak beste, lan taldean: "Bazkarien formatua izan dugu orain arte, baina aldatzeko beharra ikusi genuen. Horregatik, aurten, txokolate-jana antolatu dugu herriko plazan, herritarren eskutik".
Amurrion, bazkari trukeak
Amurrion, berriz, kulturen arteko bazkariak egingo dituzte. Iaz, 90 lagunek hartu zuten bertan parte, eta aurten ere errepikatzeko asmoa agertu dute. Amurrioko Gazte Asaanbladak gaztetxean jarri du zita.
CEAR Arabaren arabera, iaz Araban 1.000 lagun eta 44 jatorri baino gehiago elkartu zituen dinamikak. Bizkaia eta Gipuzkoako datuak gehituta, aldiz, 2.500 herritarren arteko saretzea eragin zuen jarduerak, 58 naziotako kideen parte hartzearekin.