Poztasun eta maitasun ugari jaso dituzte Olentzero eta Maridomingik urtero bezala. Azken egunetan bisitaz beteta eduki dute agenda, baina atzo ere tartea hartu zuten txikienekin egoteko. Hala, kalejira ugari egin zituzten eskualdean.
Arrankudiagara traktorean jaitsi ziren Goikoganetik. Laudion, aldiz, karroza prestatu zieten herrian barrena ibiltzeko. Urduñan, galtzagorriek lagunduta agertu ziren, eta erraldoi zein dantzarien konpainian igaro zuten iluntzea. Ondoren, plazan geratu ziren, urduñarrekin argazkiak ateratzen.
Aretan ere izan zuten ospakizuna, herria gurutzatu ostean kultura etxean bildu ziren. Okondon, berriz, plazan txokoa atondu zieten denbora batez magia luzatzeko, Gorka Moralesek margotu zuen Olentzero eta Mari Domingiren etxea. Luiaondon ere egin zuen Olentzerok geldialdia, eta umeek berarekin egoteko parada izan zuten. Ildo beretik, Artziniegan jendetza batu zen, dantzari eta trikitilari artean:
Argazkiak: Julen Solaun, Uxue Tome, Hontzuria Argazki Kluba, OScar Oliva, Antonio Muñoz, Jabi Asurmendi, Gentza Alamillo, Iosu Zaldibar, Unai Llano, Aitor Aspuru eta Gartzen Garaio.
Erredakzioa: Izar Mendiguren Cosgaya