Ostiralean erabaki zuen udalbatzan Aiarako Kuadrillak 4.108.493,63 euroko aurrekontua izatea. EAJk gehiengoa duenez, ez zuen arazorik izan egitasmoa onartzeko, baina oposizioak desadostasunak adierazi zituen.
Encina Castresana presidenteak prentsa ohar bitartez nabarmendu du: "garbiketa‐sarea, gazteria, gizarte‐ongizatea eta turismo‐sustapena bezalako gaietan sustatzen eta aurrera egiten jarraitzea da asmoa". Halaber, erakundeak azpimarratu du hainbat zerbitzu modu mankomunatuan eskainiko dituela.
Oposizioak, ordea, kontratazio gastuek gora egin dutela jarri dute zalantzan: 815.836,20 eurora helduko dira. Horren arrazoia da orain arte udal txikien arkitektoen eta aparejadoreen kontratazioa.
Berez, kontratazioak merkataritza kontratuko eredua jarraitzen zuten orain arte, baina teknikariek epaitegira eraman zuten kasua eta jadanik epaileek arkitektoei arrazoia eman diete. Ondorioz, lan kontratua izango dute aurrerantzean.
Talde independenteek (Omniak, Okondo Aurrerak eta Aiara Batuzek) horren kudeaketari buruzko bestelako iritzia zuten. Iratxe Parro bozeramaileak azaldu du: "Arkitektoei epaileek aitortu dizkiete lan kontratuak. Hori bai, %53ko lanaldikoak. Gauzak horrela, Okondok eta Artziniegak teknikari bat izango dute eta Aiarak beste bat. Horren ordez, guk proposatzen genuen arkitekto eta aparejadore bakarra kontratatzea, lanaldi osoan".
Horrez gain, talde independenteek jarraitutako eredua ere kritikatu du: "EAJk aurkeztutako proposamena ez da landu batzordean talde guztion artean".
Gauzak horrela, talde independenteek aurrekontuen aurka bozkatu zuten.
Presidentearen liberazioa
Bestalde, EH Bildu abstenitu egin zen bozketan. Koalizio independentistak hiru arrazoi eman ditu horretarako.
Alde batetik, Lamia Arcas bozeramaileak adierazi du ez zitzaiela informazio nahikorik eman ganorazko ekarpenak egiteko. Horri gehitu dio zehaztasunik gabeko zirriborroa eman ziela EAJk eta, azalpen berezirik gabe, ezin zutela horren alde egin. Zehaztasun falta horren artean kokatu dute Encina Castresana presidentearen liberazioa.
Artziniegarra izango da erakundean soldata izango duen lehen arduradun politikoa eta EH Bilduk salatu du ez zitzaiela argitu zenbateko lanaldia izango zuen (azkenean, eguneko 3,5 orduko liberazioa izango du, 20.000 euroko soldata urtero eta 7.000 euroko gastua gizarte-segurantzan). Gainera, EH Bilduk ez zuen babestu protokolo gastuen igoera.