Mugiment Kirol Txartelaren aplikazio birtuala egongo da Laudion eta Amurrion eskuragarri aste honetatik aurrera, beste herrietako kirol instalazio publikoak erabiltzea ahalbidetzeko. Txartel birtual hori Eusko Jaurlaritzak kirola egiten bultzatzeko duen programaren barnean kokatzen da. Bingen Zupiria Kultura eta Hizkuntza Politikako sailburuak adierazi duenez, Euskal Autonomia Erkidego osoko “herritar guztiei kirola egiteko erraztasun gehiago eskaintzea” da helburua.
Proiektu hau Bizkaiko hainbat herritan hasi zen 2017an pilotu bezala: Santurtzin, Portugaleten, Ortuellan, Trapagaranen, Zierbenan eta Abanton. Ondoren, Barakaldo, Sestao eta Muskiz sartu ziren. Aurten Laudiora eta Amurriora helduko da Araban, eta Aretxabaletara, Arrasatera, Bergarara, Eskoriatzara eta Oñatira Gipuzkoan.
Jaurlaritzako datuen arabera, 29.137 erabiltzailek deskargatu dute aplikazioa dagoeneko, eta 7.775 balioztatu dira. 2019an, esaterako, 17.000 erabilera baino gehiago erregistratu ziren, 2.507 erabiltzailerenak.
Nola deskargatu
Txartela erabili ahal izateko, lehenik eta behin, Mugiment Kirol Txartela aplikazioa deskargatu beharko da. Ondoren, norberak bere datu pertsonalak erabilita, erabiltzailea erregistratu beharko da, baita udalaren kirol zerbitzuan abonatua dagoela baieztatu. Aplikazioa erabilgarri dagoen beste herri bateko kirol instalazio batera sartzean, txartel digitala eta NANa aurkeztu beharko dira, aplikazioko egiaztapen kodea txertatuta.