[ASTEBURUKO AGENDA] San Anton jaia, kirola eta musika izango dira asteburuko protagonista nagusiak

Amurrioko San Anton azoka izango da asteburuko plater nagusia. Gaur bertan hasiko da, eguerdian, izen bereko ermitan egingo den meza nagusiarekin. Igandea izango da, hala ere, egun handia, artisautza eta laborantza produktuen feriarekin, 10:00etatik aurrera. 12:30ean, berriz, azokaren momentu garrantzitsuena izango da, etxeko produktuen eta txerrikien enkantea.

Baranbion ere San Anton ospatuko da larunbatean, eta arratsaldeko zortzietako herri afaria, poxpolu enkantea eta gaueko hamaiketako erromeria izango dira ekintza nagusiak.

Kirola
Hiru egunetan zehar kirolak ere izango du presentzia. Gaur, Herriaren XXIV. txapelketa jokatuko dute Labakak eta Telletxeak Santxo eta Bergeraren kontra. Lehenago, gazte kategorian, Aretako Txapelketako finalerdiak izango dira Eskuzaren eta Artarazen kontrako norgehiagokarekin. Ondoren, promesetan, Larrazabalek eta Arandiak Hormaetxea eta Egañaren kontra izango dute norgehiagoka. Partidu guztiak 19:00etatik aurrera izango dira.

Larunbatean asteburuko mendi irteerak hasiko dira Goikogane taldeak Huetora antolatutako txangoarekin, 8:00etatik aurrera. Artziniegan, aldiz, Fumikomi eta Mahastiak Labastidaren taldearen kontrako futbol sala partidua izango dute, infantil mailan, 11:00etan kiroldegian.

Igandean Urduñan eta Arrankudiagan egongo dira ere mendi irteerak, 8:00etatik eta 9:00etatik aurrera, hurrenez hurren.

Kultura
Gaur bertan, 18:00etan, Eva Guerrero koreografoak dantza klasea emango du Amurrio Antzokian. Bi ordu eta erdi geroago, Laudion, Egoitz Uriarte musikariak Fotografia musical kontzertua emango du, Keska tabernan.

Larunbatean kontzertu gehiago egongo dira Laudion eta Urduñan. Itxaropen Zikiñak, Okherrek eta Dantzetan Jarraik emanaldia emango dute Urduñako gaztetxean, Gaztetxe Egunaren barruan.

Orbeko Etxean, aldiz, Insurgenzia dokumentala aurkeztuko da eta, amaitzean, Okek, Eric Tenek, Dj Klanek, Rythmossek, Andrex Castrok eta Bendiak emango dute kontzertua. Ordu berean, Ines Osinagak (Gose taldeko kide ohiak) Alutik bakarkako emanaldia aurkeztuko du Aiaraldea Ekintzan Faktorian.

Arratsaldeko zortzietan ere, Amurrioko Kultura Etxean, Donde terminan los sueños antzerkia taularatuko da Amurrioko Kultura Etxean.