aiaraldea.eus

10 autoren kristalak apurtu dituzte bart Amurrion eta Urduñan

Erabiltzailearen aurpegia Aitor Aspuru Saez   Jendartea  Aiaraldea

Lau autok kalteak jaso dituzte Dionisio Aldama kalean eta beste bik Foru kaleko aparkalekuan Amurrion. Urduñan, aldiz, lau ibilgailu erasotu dituzte. 

10 autoren kristalak apurtu dituzte bart Amurrion eta Urduñan
Dionisio Aldama kalean kalteak izan dituen autoetako bat. / Aiaraldea.eus | Ikusi handiago | Argazki originala

Alde batetik, Amurrioko Udaltzaingoa ari da ikertzen bart gertatutakoa, eta Ertzaintza bestetik. Izan ere, 6 autoren kristalak apurtu dituzte, zehazki, kopilotuko atekoak Amurrion. Ertzaintzak gehitu du gaueko 01:00ak aldera eragin dituztela kalteak.

Urduñan, ordea, autokarabana batean jazo dira kalteak Agua Salada auzoan, beste bi autotan Gran Vían eta beste batean Geltoki kalean. Horietako batean jabeak ziurtatu du zenbait objektu falta zaizkiola.

Urduñako herritar batek ikusi ditu Agua Salada auzoko kristal hautsiak eta Aiaraldea Hedabideari adierazi dio odola zegoela autokarabanan. Horrez gain, beste furgoneta batean lapurtzen saiatu direla konturatu da, baina nabarmendu du ez dutela lortu. 

Amurrioko Udaltzaingoak jakinarazi du oraindik ezin dutela argitu lapurreta saiakerak edo ekintza bandalikoak izan diren herrian jazotakoak, baina egunak aurrera egin ahala azalduko dute.

Beste lapurreta bat asteburuan Amurrion
Kale berean salaketa gehiago jarri dituzte azken egunotan. Izan ere, Ertzaintzak jakinarazi du larunbat gauean Dionisio Aldama kalean ere lapurreta egon zela bizartegi batean. Kristala hautsi eta dirua eraman zuten.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa