60 egunez soldatarik gabe zigortu du Tubacex enpresak langile bat "guraso ardurak betetzeagatik" bajan zegoen bitartean

Mobilizazioak egingo dituzte otsailean Laudio eta Amurrioko lantegien sarreretan. / Aiaraldea.eus

Langileak salatu du bere seme-alaben bila joateagatik edo erosketak egiteagatik zigortu duela enpresak. Pneumonia baten ondorioz baja hartua zuen beharginak une horietan. Langile batzordeak azpimarratu duenez, oso larria da enpresak bajan dauden langileak jarraitzea, eta otsailean mobilizazioak egingo ditu.

I. U. Y. Tubacex enpresako langileak jakinarazi du zuzendaritzak 60 egunez lan eta soldatarik gabe zigortu duela. Berez, enpresak leporatu dio 2019ko abenduaren 2tik 20ra modu desleialean jokatzea, bajan zegoen bitartean. Antza, prozesuaren hasieran kaleratzeko arriskua zegoela ere jakinarazi zion zuzendaritzak.

Langileak azaldu du pneumonia zuen bitartean bere guraso ardurei ez ziela uko egin eta horregatik zigortu dutela. Horrez gain, nabarmendu du egozten dizkioten jarduerak  gaixotasunaren lehen egunak igarota egin zituela, “eta medikuaren aholkuak jarraiki”.

Beharginak testua zabaldu du adierazteko haserre eta suminduta dagoela, eta salatu du enpresak bere intimitate eskubidea urratu duela, baita bere familiarena ere. Halaber, uste du zigor horrekin langile guztiak izutzeko asmoa dagoela, absentismo batezbestekoak hobetzeko.

Mobilizazioak
Tubacex enpresako sindikatuek langilea babestu dute eta iragarri dute otsailean ostegunero kontzentrazioak egingo dituztela 13:00etan Laudioko eta Amurrioko lantegien sarreretan.

Langile batzordearen aburuz, logikarik gabeko txostena baliatu du enpresak zigorra erabakitzeko, eta behargina estigmatizatzea izan du helburu.

Zentzu berean, gaineratu dute Tubacexen helburua dela absentismo kopuruak hobetzea, eta ez egitea aurre lan istripuen arazoei, nahiz eta sindikatuek neurriak exijitu.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide