Amurrio eta Laudio arteko Berdintasunaren Aldeko Eskualdeko Ibilaldi Neurtuaren hirugarren edizioa egingo da datorren martxoaren 15ean.
Aldi berean hasiko da Amurrioko eta Laudioko herriko plazetatik, 10:00etan, eta partaideek 12,4 kilometroko ibilbide lauari aurre egin beharko diote, Amurrioko alkateak, Josune Irabienek, pentsa-aurrekoan adierazi duen arabera.
Parte hartu ahal izateko ezinbestekoa izango da izena ematea, otsailaren 17a eta geroztik, Altzarrate eta Kaskagorri kluben egoitzetan arratsaldez, edo Laudio, Amurrio eta Aiarako Udaletako HAZetan goizez. Izena emateko 5 euro ordaindu beharko dira, ibilaldiaren kamisetak amaitu arte. Kamisetetatik aparte, zapi oroigarri bat, dortsala eta ibilbidearen irteerarako eta bukaerarako kontrol fitxa bat emango dira ere.
Iaz, esaterako, 1.318 pertsonek egin zuten ibilbidea, baina aurten zifra 1.500 lagunetara handitzea dutela helburu zehaztu dute Udaletik. Irabienen aburuz, ekintzan parte hartzeko “ohitura hartu da” dagoeneko Aiaraldeako biztanleen artean. Ibilbideak hornidura puntua izango du Luiaondon, non partaideentzako “edariak, fruta eta gailetak” eskainiko diren.
Amaitzean, norberaren abiapuntura itzultzeko doako autobusak jarriko dira. Ondoren, hurrengo egunetan zehar, sari banaketa egingo da Aiarako Udaleko berdintasun sailean. Dena den, sariak ez dira ibilbidea azkarren egiten dutenentzako izango, “bitarteko denbora egokienak” lortu dituztenentzako baizik, gehitu dute Amurriko Udaletik.