Zinema eskaintza larunbat arratsaldean hasiko da Laudioaldeko aretoan Mujercitas filmaren emanaldi bikoitzarekin, 17:30ean eta 20:00etan. Oscar bat (jantzitegiagatik) eta sei izendapen (pelikula eta aktore onenarena, Saoirse Ronan, barnean) lortuta, Louisa May Alcott estatubatuarraren 1868ko eleberria laugarren aldiz eraman du pantaila handira Greta Gerwigek (Lady Bird). Berrikuntza bezala, oraingo honetan istorioa ez da era lineal batean kontatzen, flashbackak eta orainaldia tartekatuta baizik.
Orozkoko igande arratsaldea Las aventuras del doctor Dolittle pelikularekin hasiko da, 16:30etatik aurrera Donibane Aretoan. Stephen Gaghanen (Syriana) laugarren lan luzea da eta Vengadores: Endgame osteko Robert Downey Juniorrek protagonizatzen du. Doctor Dolittle liburuetan dago oinarrituta, baina Gerwigen filmak baino askoz ere zorte txarragoa izan du mundu osoko kritikoen balorazioekin.
Azkenik, Adú ikusi ahal izango dute bai Orozkon (19:00etan) eta baita Amurrion ere (Amurrio Antzokian 19:30ean). Salvador Calvo zuzendari madrildarraren (1898: Los últimos de Filipinas) bigarren film luzeak Afrikan girotutako hiru istorio kontatuko ditu, euren artean hasiera batean uste baino zerikusi handiagoa dutenak. Luis Tosar eta Anna Castillok protagonizatua, kritika onak jaso ditu estatuan.