Alkoholaren kontsumo arduratsua sustatzeko kanpaina bat aurkeztea izan zen ekitaldiaren helburua, “Gelditu geltokian” izenekoa. Hamar udalerrik egin zuten bat ekimenarekin: Laudio, Amurrio, Urduña, Aiara, Ugao, Arrankudiaga-Zollo, Arakaldo, Arrigorriaga, Basauri eta Bilbo.
Udalerri horiek guztiek gauza bat dute komunean: Tren geltokia dute C-3 linean. Hain zuzen, tren zerbitzuan garatuko da kanpaina, bigarren urtez jarraian.
Kartelak eta informazio-liburuxkak banatuko dituzte horretarako. Ikus-entzunezkoak ere jarriko dituzte, txartelak erosteko dauden makinetan.
Helburu nagusia honakoa izango da: Gazteei alkoholaren kontsumo arduratsuaz kontzientziatzea eta, edanez gero, autoaren ordez trena hartzera bultzatzea. “Garaiz gelditzearen garrantzia” zabaldu nahi dute kanpainarekin.
Ordutegi formatuko eskuorriak baliatuko dituzte horretarako, alkoholaren efektuei eta eraginari buruzko informazioa plazaratuta.
Bigarren edizioa
Iaz egin zuten ekimenaren lehen edizioa Laudioko eta Amurrioko Udalek. Baina, izan zuen arrakasta ikusirik, beste zortzi udal batu dira ekimenera, arestian aipatutako herrietakoak.