aiaraldea.eus

Hainbat ekintza antolatu dituzte Laudioko Gaztetxeak eta Ikasle Abertzaleak, “langileok haustura politikoa” lemapean

Erabiltzailearen aurpegia Txabi Alvarado Bañares   Politika  Aiaraldea

Gaurtik igandera arte luzatuko da bi eragileek prestatutako dinamika.

Hainbat ekintza antolatu dituzte Laudioko Gaztetxeak eta Ikasle Abertzaleak, “langileok haustura politikoa” lemapean
Aiaraldeko Ikasle Abertzaleak antolakundeak eginiko elkarretaratze baten irudia. / @AiaraldeakoIA | Ikusi handiago | Argazki originala

Aiaraldeko Ikasle Abertzaleak eta Laudioko Gaztetxeak bat egin dute Gasteizen abiatutako “Langileok haustura politikoa. Elkartasunetik klase batasunera” dinamikarekin. Hainbat ekintza antolatu dituzte horretarako, gaurtik martxoaren 8ra bitartean.

Hitzaldi bat da gaurko antolatu dutena. “Martxoaren 3ko gertakariak eta gaur egungo erronkak: Langileok haustura politikoa blokearen aurkezpena izango da solasaldiaren izenburua eta Kultura Etxeko Arraño Gelan eskainiko dute, arratsaldeko zazpietatik aurrera.

Bihar aldiz, Gasteizera mugituko dira, bertan arratsaldeko seietan Rafa Plazatik abiatuko den blokera batzeko. Ostegunean Gasteizko Ikasle Autodefentsa sarea gonbidatuko dute, mota horretako sareei buruz Kultur etxean eskainiko duten hitzaldira.  Ostiralean elkarretaratzea egingo dute Lamuza plazan, 11:00etan, eta Emakume langilearen autodefentsaren beharraz izeneko tailerra burutuko dute gero.

Martxoaren 8an emango diote amaiera dinamikari. Egun horretan egingo diren dinamiketan parte hartzeko deia zabaldu dute.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa