Prentsaurrekoa eskaini du gaur goizean LAB sindikatuak bere Bilboko egoitzan, Zorroza gestión de residuos enpresari buruz aritzeko.
Erakundeak azaldu duenez, otsailaren 24an istripua gertatu zenean, B. D. hildako langilea, beste bi lankide eta enpresako arduraduna 9 metroko altuerako teilatuan zeuden igota, inolako segurtasun neurririk gabe, Zorrozako kudeatzailearen aginduz.
17:00ak igarota "B. D. enpresaren barrukaldera erori zen teilatuaren zati bat erori ondoren. Han zeuden langileek B. D.rengana jo zuten eta larri zegoen arren, oraindik bizirik zegoela ikusi zuten".
Sindikatuaren arabera, Zorroza gestión de residuos-eko kudeatzaileak behartu zituen langileak B. D. mugitzera, bere lanpostutik gertu egon zedin. Horrez gain, agindu zien esateko ez zela teilatutik erori, "zintatik baizik".
Horren guztiaren larritasuna ez ezik, LABek salatu du Ertzaintzak, gutxienez, behargin bat akusatu duela "ustezko estalketa delitugatik". Erakundeak oso arriskutsutzat jo du prebentzio faltaren biktimak heriotzaren erantzule bilakatu nahi izatea.
Aiaraldea hedabideak erreportajea osatu du hainbat langile ohiren lekukotzak jasota. Zorrozako zuzendaritzak ez du oraindik adierazpenik egin, Aiaraldea komunikabidea harremanetan jarri arren.