Aldaketa nabarmenak ekarri dituzte konfinamenduak eta alarma egoerak eskualdeko herritarren egunerokotasunera, eta suhiltzaileak ez dira salbuespena izan. “Guztiz” aldatu da Laudioko suhiltzaile parkeko bizitza, Igor Biribai Ibarluzearen hitzetan. “Segurtasun neurriak handitu egin dira. Azpiegituren garbiketa eta desinfekzio lanak areagotu egin dira, Covid-19 birusa geldiarazteko. Momentuz ondo egiten ari gara aurre”.
Sute gutxiago, garbiketa gehiago
Kanpoan egiten dituzten ekintzen nolakotasuna ere aldatu da, suhiltzaileak azaldu duenez. Lehen ura zen euren funtsezko lehengaia. Orain, aldiz, produktu kimikoak baliatzen dituzte. “Jaitsi egin da lehen ohikoak ziren ekintzen kopurua”. Horren arrazoia sinplea da, Biribairen arabera: “Ekintza horiek oso lotuta daude gizakien jardun kopurura”. Hau da, kalean mugimendu gutxi dagoenez, jaitsi egin da sute eta istripu kopurua.
Hala ere, suhiltzaileen lan-zama ez da txikitu, desinfekzio-lanak egitera pasa baitira. “Jendea pilatzen den tokietan aritzen gara batez ere, eta baita nagusien egoitzetan, merkataritza guneetan eta osasun zentroetan”.
“Pandemia kontrolpean izatea” dute helburu. Hainbat baliabide dituzte horretarako. “Hipoklorito eta urez eginiko nahasketa batekin bete dugu baso-suteetarako erabiltzen genuen kamioiaren zisterna”. Disoluzio hori erabiltzen dute tokiak desinfektatzeko. Matabiak ere erabiltzen dituzte, nekazaritza alorrean (fumigatzeko, adibidez) erabiltzen diren motxilak.
Biribaik erantsi duenez, gaur egun 4 suhiltzaile daude txanda bakoitzean. “Lanera sartzen garen goizean Arabako suhiltzaileen zuzendariak gure taldeko buruari bidaltzen dio egun horretan egin beharreko desinfekzioen zerrenda, eta lehentasunen arabera ordenatuta ekiten diogu lanari”. Hala ere, Biribaik nabarmendu du antzeko garbiketa lanetan dauden bestelako taldeekin koordinatzen direla, “lanak eta indarrak bateratzeko”.
“Laguntzeko prest” daudela gaineratu du suhiltzaileak. “Hemen gaude. Trebakuntza eta baliabideak ditugu eta hemen egongo gara beti, laguntzeko prest”.