.jpeg)
Untzueta Nafar Gaztelua elkarteak ez du eten azken 8 urteetan abiatutako egitasmoa. Aurten, mendira joan eta bazkaria egin ordez, brindisa proposatu dute "Nafarroaren Egunean". Bide batez, taldeak deialdia zabaldu du apirilaren 26an, 12:00etan, Nafar ikurra eta ikurrina leiho edo balkoietara ateratzeko. Horrela omendu nahi dute Juan Luis Gaztaka. Ugaoko herritarra duela gutxi zendu da, eta elkarteko kidea eta historiazalea zen. Horrez gain, taldea babestu zuen hasieratik.
8 urte
Txomin Egiluzek azaldu duenez, duela 8 urte abiatu zuten "Untzuetako gazteluko nafartasuna" aldarrikatzeko ekimena: "Nabarraldek proposatu zuen, eta gu Untzuetako gazteluan hasi ginen lanean. Helburua da nafarrak izan diren euskal gaztelu orotan zerbait jartzea, iragan hori oroitzeko".
Arrankudiaga-Zollo, Orozko, Arakaldo, Ugao eta Zeberioko lagunak batu ziren hori gauzatzeko; eta azken urteotan mendi ibilaldiak antolatu dituzte Untzuetara igotzeko. Halaber, eskultura jarri dute bertan eta Kukutzen ere ikur nafarra instalatu dute.
Txomin Egiluzen iritziz, ez da aldarrikapen politikoa, historikoa baizik: "Nafarroaren lurraldea honaino heldu zen gaztelarren menpe geratu baino lehen. Guk hori gogoratu nahi dugu, eta Nafarroarekin senidetu. Ez dugu esparru politikoan horrelako aldarrikapenik egin, bakarrik ikuspuntu historikotik".