Osakidetzak jakinarazi berri du atzo koronabirus positibo bakarra aurkitu zuela Aiaraldean, Amurrion hain zuzen. Horrekin, 249 kasu detektatu ditu eskualdean, baina azken astean nabarmen jaitsi dira gaixo berriak. Astelehenean ez zuten bat bera ere erregistratu, asteartean eta asteazkenean bina egunero, ostegunean 4; eta atzo, azkenik, bakarra.
Horrela, Laudiok 96 kutsatu ditu, Amurriok 71, Urduñak 26, Aiarak 24, Orozkok 17, Artziniegak 9 eta Okondok 6. Berez, pasa den astean, egunero kasu kopuruak 5 izan ziren gehienez. Are, soilik gainditu zen kopuru hori pasa den larunbatean, Urduñako nagusien egoitzan egindako testen ondorioz. Izan ere, 5 kasu aurkitu zituzten bertan.
Oro har, positibo bakarra edo 2 topatu ditu egunero Osakidetzak apirilaren 13tik gaur arte; eta diagnostiko berrien kopurua egonkortu da, grafikoan ikus daitekeen moduan.
EAEri dagokionez, positiboak ez dira jaitsi azken egunetan arrazoia argia dela medio: test kopurua biderkatu da. Esaterako, atzo 348 kasu berri identifikatu bazituzten, baina 5.343 test egin zituen horretarako. Apirilaren 10ean 366 gaixo erregistratu zituzten, baina egindako azterketak 1.672 izan ziren.
Guztira, 14.132 kutsatu daude EAEn: 8.025 Bizkaian, 3.551 Araban eta 2.556 Gipuzkoan. Hildakoen kopurua 1.212ra heldu da, eta horrek esan nahi du 19 kagun gehiago zendu direla.