Maiatzaren 1a dela eta LAB sindikatuak mobilizazio ibiltariak antolatuko ditu Aiaraldean, bi kotxe karabana eginda 10:00etatik 11:30etara. Batek Laudio eta Orozko arteko tartea beteko du eta besteak Amurrio eta Urduña artekoa. Kontuan hartu beharra dago sindikatuko delegatuek soilik parte hartuko dutela, baimen berezia lortu baitute. Karabanak suhiltzaileen eta osasun langileen egoitzen aurrean geldituko dira, haien lana omentzeko asmoarekin.
Sindikatu abertzaleak egun osoko egitaraua prestatu du; bere YouTube kanaleanstreaming bidez jarraitu ahalko direnak. 11:35ean Hokoke dokumentalaren proiekzioa egingo da. Amaitu eta jarraian, 12:30ean, eguneko ekintza nagusia egingo dute: Ulises Gullarte Central de Trabajadores de Cuba-ko kidearen agurrarekin eta LABeko idazkari nagusiaren, Garbiñe Aranbururen, mezuarekin.
16:30etatik aurrera jarraituko dute programazioarekin Hotel explotación dokumentalaren emisioarekin. Ondoren, 17:30ean, zaintzaren inguruko solasaldia antolatuko dute, Maria Sarasola helduen egoitzetako erizainarekin, Josefina Roco Sanfilippo politologoarekin eta Eli Etxeberria LABeko idazkari feministarekin. Aiora Imaz LABeko Barne Komunikazioko arduraduna izango da moderatzailea.
Amaitzen joateko, Shockaren doktrina dokumentala proiektatuko da 18:20ean eta, 19:45etatik aurrera, “mundua eraldatu duten langileei txaloak” eskaintzeko deia luzatu dute, leiho eta balkoietan gehiengo sindikalak sustatutako ikurra jartzeko deia eginda.