Lan istripuei dagokienez, Aiaraldean iazko uztailean hasi zen joera ez du ezerk gelditzen, ezta koronabirusak ere. Gaur beste langile bat zendu da bere jardunean, Luiaondon. Zenbait hedabidek azaldu dutenez, hildakoak 40 urte zituen eta Zeanurikoa zen. Horrenbestez, 10 hilabetetan eskualdeari lotutako 6 langilek galdu dute bizitza beharrean.
Zerrenda garratz hori iazko uztailean abiatu zen Tubacexen, Laudioko gazte bat hil zenean herri bereko faktorian. Irailean Aceralavan -Amurrion- hil zen beste laudioar bat. 2020ko otsailean herri bereko beste bizilagun batek galdu zuen bizia Galdakaoko GHI Hornos Industriales enpresan. Otsailaren 24an, aldiz, behargin senegaldarra hil zen Murgako Zorroza Gestión de Residuosen.
Hori gutxi balitz, pandemiaren erdian, apirilaren 16an, Laudioko beste herritar bat hil zen bere lanpostuan, Arrigorriagako Talleres Berasategui enpresan. Osalanek adierazi zuen hasierako txostenean gertakaria ez traumatikoa izan zitekeela.
Edonola ere, osasun larrialdiak iraun bitartean, langileen eta enpresen zuzendaritzen arteko talkak ohikoak izan dira hainbat enpresa garrantzitsutan; Tubacexen edo Tubos Reunidosen, esaterako, eta erakundeek ez dute interes berezirik erakutsi langileen aldarrikapenetan.
Horrela, segurtasun erronka berriei gabezia zaharrak gehitu zaizkie. Tubos Reunidos lantegiko behargin batek, adibidez, ospitalean bukatu zuen apirilaren amaieran. Sindikatuek salatu zuten aspaldi hori gerta zitekeela, baina inork ez zuen ezer egin istripua eragindako makinaren arazoari aurre egiteko.
Gauzak horrela, erakunde publikoei, bereziki tokikoei, eskatu behar zaie eskualdeko beste pandemiari ere erreparatzea. 6 lan heriotza nahikoa eta soberan izan beharko lirateke horretarako.
Hala ere, guztiz kontrakoa gertatu da azken hilabeteetan, eta enpresetan ez dute lan ikuskaritzaren berririk izan.
Munduko pandemiak txunditu arren, Aiaraldeko gaitz sozial eta ekonomikoei heltzeko ordua izaten jarraitzen du. Agian zuhaitzek ez dute basoa ikusten uzten, baina gaur pinu batek beste behargin bat hil du, eta ohitura bilakatzen ari da langile bat lurperatzea bi hilean behin. Naturaltasunez hori onartu ez duen gizartea izan nahi badugu jadanik berandu gabiltza, bereziki instituzioak.
Covid-19ak ez ohiko neurriak hartzera behartu gaitu, zer beharko dugu eskualdean odoluste honi amaiera emateko?