Espainiako eta Frantziako Estatuek zenbait neurri hartu dituzte kartzelan dauden lagunek bisitak izan ditzaten. Hala ere, Aiaraldeko presoek, Euskal Preso Politikoen Kolektiboko kide gehienek bezala, ez dute horretarako aukerarik izango momentuz.
Etxerat elkarteak salatu duenez, euskal preso politikoek ez dituzte betetzen frantziar zein espainiar sakabanaketa politikak ezarritako baldintzak. Adibidez, Espainiar Gobernuak soilik baimentzen ditu bisitak 1. Fasean dauden probintzietan, baldin eta bisitariak eremu berean bizi badira. Zentzu horretan, Iñaki Krutxaga Almeriako presondegian dago, eta Idoia Martinez, aldiz, Avilésen (Asturias), euren lagunak eta senideak Euskal Herrian bizi diren bitartean.
Gobernu Frantziarrak, ordea, bakarrik irekiko die atea kartzelara hurbiltzeko 100 kilometro baino gutxiagoko bidaiak egiten dituztenei. Hori dela eta, Alaitz Aramendik senideak eta lagunak ikusi gabe jarraituko du, Renneseko espetxean baitago.
Horrez gain, senideek gaineratu dute, momentuz, Hegoaldetik Iparraldera igarotzea ezinezkoa dela, muga itxita baitago. Gauzak horrela, orozkoarraren familiak uste du ekainera arte, gutxienez, ez dutela ikusiko.
Gogoratu beharra dago martxoaren hasieran uko egin zietela euskal preso politikoek bisitei, pandemiaren zabalpena ekiditeko. Hortaz, bi hilabete egin dituzte senideekin edo lagunekin harreman zuzena izan gabe, soilik telefonoa baliatu dezakete eta.