Laia Eskolak, “LGTBI pertsonen eguneroko bizitzan degoen errealitate anitzaren ikusgaitasuna” bultzatzeko Sentipenak Askatuz bideo laburren festibala antolatuko du, Yogurinha Borova artista laudioarraren laguntzarekin.
Ohar batean adierazi duten arabera, jaialdian nahi duten guztiek parte hartu ahalko dute, Yogurinha Borovaren Sentipenak Askatu abestia oinarri hartuta gehienez minutu bateko bideo horizontala filmatuta. “Bideoan dantzatu, abestu, playbacka eta Tik Tok sare soziala erabili ahalko da”, zehaztu du Laia Eskolak.
Era berean, ezinbestekoa izango da festibala Twitter, Facebook edo Instagram sareetan jarraitzea eta, igotzeko orduan #SentipenakAskatuFestibala traola idaztea.
Posiblea izango da ere laiaplazara@eskola.eus helbidera edo 600 771 183 zenbakira WhatsApp edo Telegram bidez bildatzea. Bideoak bidaltzeko epea ekainaren 23an amaituko da.
Edozein adinekoak izan ahalko dira partaideak, betiere adingabekoentzako ezarritako baldintzak errespetatuta: “Parte hartzaileak adin guztietakoak izan daitezke; banaka, taldeka zein familian ager daitezke. Adingaberik balego, baimen orria beteta bidali behar da bideoekin batera”.
Ikusgaitasuna sustatzeaz gain, indarkeria eta bazterkeria ekiditea ere bilatuko da ekintza horren bidez, bizimodu desberdinekiko errespetua bultzatzearren: “Aske bizitzeagatik eta euren sexu-orientazioa edota genero-identitatea agertzeagatik paira dezaketen edozein motatako bazterkeria ekiditeko”.
Bideoak hemen ikusi daitezke.