Aiaraldeak tarte handia izango du 2020ko Euskal Herriko mendi duatloien zirkuituan. 10 proba barne hartuko ditu aurtengo txapelketak, eta horietako bi eskualdean izango dira.
Urduñan izango da lehenbizikoa, eta Arespalditzan bigarrena. Zehazki, irailaren 19an antolatuko dute kirol jarduera Urduñan, eta urriaren 17an Aiaran.
Euskal Herriko lehiaketaren antolatzaileek sare sozialetan azaldu dutenez, aspaldi prestatu zuten egutegia, baina orain arte ez dute plazaratu Covid-19 birusak eragindako ziurgabetasunagatik: "Azken egunetan jaso ditugun instrukzioek baikorrak izateko bidea eman digute".
Hala ere, ez dituzte hitzordu guztiak zehaztu, "Adunako probari ez diogu datarik jarri egutegia zabalik baitago eta beste probaren bat sartuko balitz dataz aldatu beharko genukeelako". Alabaina, Adunakoa izango da zirkuituko azken norgehiagoka.
Egoera medio, parte-hartzaileen babesa eta segurtasunari lehentasuna emango diote. Horren adibide da arriskuak arintzeko aplikatutako protokoloa: "Koronabirusa kutsatzeko arriskuak murrizteko tresna gisa erabiliko da ekitaldi guztietan. Gida hau dokumentu bizia izango da, eta bertsio berrietara egokituko beharko da Osasun Ministerioak eta gainerako agintari eskudunek kirolaren konfinamendu deseskalatze faseetarako eman ditzaketen arau, jarraibide eta gomendio espezifikoetara".
Adibidetara ekarrita, dortsala jasotzerakoan, irteera gunean, boxetan, anoa postuetan zein helmugan jokabide berriak arautuko dituzte.