Osakidetzak jakinarazi duenez, pandemia hasi zenetik ekainaren 8ra bitartean -hau da, krisialdiaren unerik gogorrenetan- 23 aiaraldear hil dira COVID-19aren ondorioz.
Zehazki, 9 herritar zendu dira Laudion, 8 Amurrion, 3 Orozkon eta bana Okondon, Artziniegan eta Aiaran. Arrankudiaga-Zollon, Arakaldon eta Urduñan ez da heriotzarik jazo koronabirusa dela medio.
Gaixo kopurua eta hildako herritarrak aintzat hartuta, Okondon izan da emaitza bortitzena, kutsatuen %14,4 zendu baita. Orozkon heriotza eragina %12,5ekoa izan da, Artziniegan %9,1ekoa, Amurrion %7koa, Laudion %5,8koa eta Aiaran %1,6koa. Guztira, birusak kutsatuta %5,5 hil dira.
418 herritar kutsatu eta 23 aiaraldear hil ditu koronabirusak Aiaraldean; hau da, gaixotuen %5,5.
Urduñan, Arrankudiaga-Zollon eta Arakaldon inor ez da hil osasun sistemaren arabera, COVID-19aren ondorioz. Berez, hiru udalerri horietatik bakarrik Urduñan topatu dituzte kasuak. Hori bai, 42 izan ziren.
Izan ere, eskualdean 418 koronabirus kasu detektatu ditu Osakidetzak: Laudion 156, Amurrion 114, Aiaran 64, Urduñan 42, Orozkon 24, Artziniegan 11 eta Okondon 7. Arrankudiaga-Zollon eta Arakaldon ez dituzte positiborik frogatu.
Erakundeak 100.000 biztanleko tasa erabili du koronabirusaren zabalpena neurtzeko herrika ere. Horrela, Aiara izan da udalerririk kaltetuena, 2.206,1 tasarekin. Hurrengo herria Amurrio izan da (1.094,2), eta gero daude Urduña (982,7), Orozko (918,5), Laudio (850,4), Okondo (581,4) eta Artziniega (572,3).