Mobilizazioak egingo dituzte gaur arratsaldean Laudion eta Amurrion, “beste eredu sozioekonomiko bat” aldarrikatzeko. Euskal Herriko Eskubide Sozialen Kartak deitutako mobilizazio egunaren barruan kokatzen dira eskualdeko bi deialdi horiek. Euskal Herriko 45 udalerritan egingo dira gaur manifestazioak, “Publikoa, funtsezkoa zaindu, aberastasuna banatu” lelopean.
Gehiengo sindikala eta beste hainbat eragile barnebiltzen dituen plataforma da Eskubide Sozialen Karta, eta hainbat neurri aplikatzea eskatu nahi du gaur egingo diren mobilizazioekin: zerbitzu publikoak garatzea, zaintza sistema publiko bat sortzea, 1.080euroko gutxieneko pentsioa lortzea, 1.200 euroko gutxieneko soldata, 35 orduko gehienezko lanaldia eta aberatsenei zergan igotzea, besteak beste.
Arratsaldeko zazpietan izango dira eskualdeko bi mobilizazioak. Laudiokoa Lamuza plazatik abiatuko da. Amurriokoa, aldiz, udaletxe aurretik. Segurtasun neurriak mantenduko direla ziurtatu dute antolatzaileek, eta “maskara eta txaleko horia” eramateko deia luzatu dute.