Eusko Jaurlaritzak eta Landa Garapenerako Europako Nekazaritza Funtsak 1.175.561,59 euro inbertituko dituzte Aiaraldeko landa eremuetan. 2019ko Landa Garapenerako laguntzen bi deialdietako (Leader eta Erein) laguntzak banatuko dira eskualdean. 25 proiekturi emango zaie dirua. Horietako 13 ekimen publikoak eta beste 12 pribatuak.
Aiaraldeko udalerrien landa eremuen “promozioa, garapena eta dibertsifikazioa” sustatzea izango da helburua, Zabaia Aiara Haraneko Landa Garapenerako elkartearen arabera. Herriak hobetzeko “funtsezkoa” izango da egingo den inbertsioa, elkartearen aburuz.
Aiara, Okondo eta Artziniegako Udalek eta Aiarako Administrazio Batzarrak Leader deialdian eskatu zituzten laguntzak iaz, hainbat proiektu, zerbitzu eta azpiegitura indartu ahal izateko aurten. Landa eremuko biztanleen bizi kalitatea hobetzea da helburua. Aurrera eramango diren proiektuen artean honako hauek daude: argiztapen publikoak hobetzea, espazio publikoak egokitzea eta instalazio publikoetako irisgarritasuna bermatzea.
Ekimen pribatuei dagokienez, enpresak sortzeko, handitzeko eta berriztatzera bideratuko dira laguntzak. Zehazki, honetara bideratuko da dirua: hiru enpresa sortzera, beste bost handitu eta berriztatzera, bi lanpostu eratzera eta etxebizitza bat berritzera.
Era berean, sei proiektu publiko eta pribatu bat onartu ziren Laudio eta Amurrion, Erein deialdiaren barruan, landa eremuko populazioaren bizi kalitatea hobetzeko eta baita sektore turistikoaren jarduera indartzeko ere.