Tubacex taldeko zuzendaritzak ez du baztertzen langileak kaleratzea COVID-19ak sortutako krisialdiari aurre egiteko

Ehunka langilemobilizatu ziren atzo Amurrioko lantegiaren aurrean. / Aiaraldea.eus

Atzo Tubacex taldeko akziodunen batzarra izan zen eta Alvaro Videgain enpresako presidenteak eta Jesus Esmoris kontseilariordeak azaldu zuten berregituraketa prestatzen ari direla. Kaleratzeak egiteari ez diote atea itxi, antza.

Atzo ehunka langilek lanuztea eta elkarretaratzea egin zuten Amurrion, Tubacex taldeko zuzendaritzak eta akziodunek batzarra baitzuten. Horren ostean, prentsaurrekoa deitu zuen enpresak landutakoa azaltzeko.

Besteak beste, Alvaro Videgain Tubacexeko presidenteak eta Jesus Esmoris kontseilariordeak aipatu zuten 2020an 800 milioi euro fakturatzea aurreikusi dutela, baina koronabirusak eragindako krisialdiaren ondorioz, emaitza negatiboak egongo dira aurten. Printzipioz, lehen hiruhilekoan,  1,6 milioi euro galdu ditu korporazioak.

Tubacexeko lehendakari eta kontseilari ordearen esanetan,  1.6 milioi euro galdu dituzte lehen hiruhilekoan

Gainera, ez dute espero udaberrian emaitzek hobera egitea,, eskaera kopurua oso txikia izan baita. Hori dela eta, Tubacexeko akzioek %49ko balioa galdu dute burtsan.

Neurriak krisialdiaren aurrean

Indiako lantegia ohiko moduan lanean dagoen arren, Euskal Herrian dituzten faktoriak %50eko lanaldian daude, eta enplegua erregulatzeko espedientea urrira arte indarrean egotea aurreikusi du zuzendaritzak. 

Epe ertainera, akziodunen batzarrak ez dtiu baztertu, ordea, kaleratzeak edota enplegu finkoa suntsitzea. Berregituraketa plana lantzen ari dira enpresan eta sektorearen norabidearen menpe egongo omen da guztia. Jesus Esmorisek adierazi zuenez, gainerako konpainiek berregituraketa lazgarriak egin dituzte.

Iragarritako beste neurri bat izan zen inbertsio erdien etetea. Hori bai, etekingarria izanez gero, ez zuten alde batera utzi beste enpresak erostea.

Epaiketak eta kaleratzeak

Tubacex enpresako akziodunen batzarrak bere ondorioak publiko egiten zituen bitartean, Amurrioko Aceralava lantegiaren atarian elkartu ziren ehunka behargin enpresan egondako azken bi kaleratzeak salatzeko.

Dirudienez, enpresak jakinarazi die ez dagoela modurik bi langile horiek berriro onartzeko. Are gehiago, beharginek epaiketak irabaziz gero, zuzendaritzak aurreratu du kalte-ordaina hautatuko duela, berriro kontratatu ordez.

Edonola ere, ez da hori Tubacexek pendiente duen auzi bakarra. Ekainaren 17an izan zuten beste epaiketa bat,  eta sindikatuek irabaziz gero, indarrean dagoen enplegua erregulatzeko espedientea atzera bota dezake epaileak.

Ezinegona langileen artean

Atzoko elkarretaratzean sumina nabaria zen beharginen artean. Oro har, gertatutako bi kaleratzeak intimitatearen kontrako erasotzat jo dituzte, baina horrez gain, ezinegona ere bazegoen.

Videgainek eta Esmorisek berregituraketa plana aipatu baino lehen, beharginek euren lanpostuak arriskuan jar ditzaketen neurriak aurreikusi zituzten. Langileen ustez, horiek eragina izan dezakete, bereziki, Amurrion.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide