Iturrigorri gainean kontzertua eskainiko du Urmuga proiektuak

Ponatan izango da kontzertua. / Aiaraldea

Uztailaren 14an hasiko da Urmuga ekimena Angulotik Urduñarainoko zeharkaldiarekin. Iturrigorrin kontzertua eskainiko dute 13:00etan Maider Zabalegik, Et Incarnatus Hari Laukoteak, Flavio Banteriak, Xabi Zeberio biolinjoleak eta Amaia Elizaran dantzariak.

Asteartean hasiko da Urmuga mendi zeharkaldia. Aurten sortu dute egitasmoa, eta Euskal Herria zeharkatuko dute gailurrez gailur. Ez da hori izango, ordea, berezitasun bakarra: musika kontzertuez gozatzeko parada izango dute partaideek ibilbidean barrena. Webgunean bildu dute informazio guztia.

Uztailaren 14an abiatuko da ibilaldia, Aiaraldetik. Zehazki, Angulotik Urduñaraino joango dira mendizaleak. Julen Reketa izango da, besteak beste, gidarietako bat: "8:30ak aldera hasiko gara oinez, 13:00ak inguruan Iturrigorrin -Ponatako artzain gunean- kontzertua eskaintzeko". Toki berezia eta polita aukeratu dute, mendizale laudioarraren aburuz, horretarako, "artzain gunea zen, zelaigune zoragarria dago; egun txabola bakarra geratzen da, lehen gehiago zeuden arren".

Kontzertua ikusteko Lendoñogoititik joatea da onena. "Senda Negra amaieran kide bat egongo da kontzertu gunera bideratzeko", aurreratu du Reketak. Alabaina, musukoa eramatea gomendatu dute.

13:00etan izango da Ponatako artzain gunean kontzertua, Iturrigorri inguruan

COVID-19ak eragindako egoera dela-eta, derrigorrezkoa da zeharkaldian parte hartzeko izen-ematea, "webgunera jo behar da horretarako". Hala, pertsona kopurua kontrolatu ahalko dute, "zenbat ikus-entzule egongo diren jakin behar dugu segurtasun neurriak betetzeko".

Sokadun laukotea, pianojolea eta dantzaria arituko dira ikuskizuna eskaintzen.  Zehazki, Maider Zabalegi, Et Incarnatus Hari Laukoteak, Flavio Banteriak, Xabi Zeberio biolinjoleak eta Amaia Elizaran dantzariak hartuko dute parte.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide