Elkarretaratzea egingo du bihar -uztailak 10- ASASAMek Arabako Foru Aldundiaren aurrean, 12:00etan. Aiaraldean intentsitate handiko bizitoki bat jartzea eskatuko dute buru osasuneko arazoak dituzten pertsonen eta senideen elkarteko kideek.
Azaldu dutenez, 12 urte daramate azpiegitura horren beharra aldarrikatzen. Erakundeen aldetik “promesa itxaropentsuak” jaso zituzten, baina 2008ko krisiak “eten” egin zituen. Hala ere, azken urteetan proiektua egitear zegoela zirudiela nabarmendu dute ASASAMeko kideek, Aldundiaren aurrekontuen luzapenean gastu-partida bat zehaztu zelako proiektua garatzeko.
“Higiezina non kokatu zehaztea” falta zen soilik, elkarteko kideen hitzetan. “Iaz, Laudion 6 plazako bizitoki-baliabidea ezartzeko promesa hori berehala gauzatuko zela aditzera eman zen, Ramiro Gonzalez Ahaldun Nagusiaren esanetan eta udal eta foru hauteskundeen bezperako testuinguruan”. ASASAM elkarteak hainbat ekimen egin zituzten garai hartan: sinadura bilketa abiatu zuten, eta baita bihar egingo dutenaren antzeko elkarretaratzeak ere.
Hauteskundeen ostean bilera bat eskatu zuten Emilio Sola Gizarte Ongizateko diputatuarekin. “Gaiari buruz bere harridura eta erabateko ezjakintasuna adierazi zigun, eta beste behin, babesik gabe eta erabiliak sentitu gara”.
Gauzak hala, Batzar Nagusietan agerraldia egin zuten elkarteko ordezkariek iragan ekainaren 12an. Bertan azaldu zutenez, COVID-19aren ondorioz ezarritako alarma egoerak “are nabarmenagoa” egin du azpiegitura hori behar dela Aiaraldean.
Horregatik erabaki dute bihar elkarretaratzea egitea, “aldarrikapenak modu aktiboagoan egiteko” eta buru osasuneko arazoak dituzten pertsonen “gabezia sozialak" salatzeko.