Hezkuntza zentroentzat soilik ez, pentsiodunen mugimenduarentzat ere gaur hasi da ikasturtea. Araba, Bizkaia, Gipuzkoa eta Nafarroako hiriburutan eta 70 herritan egin ditu elkarretaratzeak gaur eguerdian Hego Euskal Herriko Pentsiodunen Mugimenduak.
Laudion, Amurrion eta Artziniegan ere entzun dira pentsio duinen aldeko aldarriak. “Bizitza asko dugu aurretik eta gauza asko aldatu behar dira hurrengo belaunaldiei gizarte justu, solidario, iraunkor eta osasuntsua uzteko”, ohartarazi dute mobilizazioetan, eta nabarmendu dute “zaintzen” zein “kalean borrokan” jarraituko dutela.
Pandemiak “aurpegi bikoitza” duela azaldu dute: “gaixotasunaren aurpegia eta pobreziaren aurpegia”.
Egoitza asko oraindik leku seguruak ez direla salatu dute, ez direlako “beharrezko neurriak eta baliabideak” hartu. Gauzak hala, autonomia erkidegoetako zein estatuko aurrekontuetan “pentsiodunen mugimenduaren ahotsa eta aldarrikapenak entzun eta aintzat hartzea” eskatu dute.
Herritarren diru-sarrerak geroz eta murritzagoak direla gaineratu dute pentsiodunek, osasun zein ekonomia krisien ondorioz. Pentsioak jasotzen dituzten emakumeen egoera are latzagoa dela nabarmendu dute; “gainera, aitortu eta ordaindu gabeko zainketa lana ugaritu egin zaie”.
“Banku Zentralek zirkulazioan jarri dituzten bilioika euroak aipatzen dituzte gobernuek, baina osasun-sistema eta sistema sozio-sanitarioa ez dira asistentziaren kalitatea hobetzen ari”, salatu dute, “azken bi urteetan entzun ditugun promesa eta ipuin berberak entzungo ditugu berriz ere; baina ez dugu beste promesarik nahi, pentsio publiko duinen sistema publikoa bermatuko duten egitateak nahi ditugu”.
Gauzak hala, hurrengo asteetan ere mobilizatzeko deia luzatu dute.
Argazkiak: Roberto Arribas eta Txabi Alvarado