Tubacexeko lanpostuen defentsan mobilizazio eguna deitu du gaur enpresa horretako Langile Batzordeak. Izan ere, 150 behargin egon daitezke kaleratze arriskuan. Dena den, negoziaketa prozesuan daude uneotan. Datorren astean izango dute bilera langileen ordezkariek eta zuzendaritzak.
Egoera salatzeko mobilizazio eguna izan da gaurkoa. Tubacex enpresak bailaran dituen fabrika guztietan deitu dituzte lanuzteak, eta "erabatekoa" izan da jarraipena. Bestalde, 15:00etan abiatu da Amurrioko Juan Urrutia plazatik langileen martxa. Tubos Reunidos fabrikaren atean, bertako beharginak batu dira martxara. Hala, Laudiorainoko bidea osatu dute.
Manifestazio oso jendetsua
Mila lagunetik gorako mobilizazioa izan da Laudiokoa. Horren adierazle da herriguneko kaleak txiki geratu izana. Herriko plazan egin dute amaiera ekitaldia. Enpresa Batzordeko bi kidek hartu dute hitza: "Eskerrak eman nahi dizkizuegu egun hauetan jasotako laguntzagatik: pentsiodunak, merkatariak, eskualdeko udalak, alderdi politikoak, inguruko enpresak, ikasleak... Azken batean eskualdea osatzen dugun herritar guztiak". Langileen iritziz, "Aiaraldeak enpleguaren aldeko konpromisoa erakutsi du berriro".
Eragile ugariren babesa
Pentsionistek, ELA eta LAB sindikatuek, ESKk edota Ernaik egin dute bat ekimenarekin, besteak beste. Alderdien artean ere babesa izan da nagusi: EAJk, EH Bilduk, Omniak, Orain Amurriok eta Arabako PPk ere egin dituzte adierazpenak sare sozialetan, besteak beste. Ordezkaritza politikoa ere handia izan da. Manifestazioan egon dira, herritarren artean, eskualdeko alkate gehienak (Ander Añibarro, Josune Irabien, Itziar Biguri zein Joseba Vivanco, besteak beste). Adibidez, Aiarako udal osoko bilkuraren hasiera ordua aurreratu dute mobilizazioan parte hartzeko. Halaber, EH Bilduko ordezkariek, EAJkoek, PSE-EEkoek eta PPkoek ere parte hartu dute.
Gaur egun 800 behargin inguru ditu Tubacexek Amurrioko eta Laudioko lantegietan. Zuzendaritzak 150 langileren kostua murrizteko proposamena luzatu die sindikatuei, 10 milioi euro aurrezteko.